അബ്ദുസ്സലാം കൂടരഞ്ഞി#

റിയാദ്: ശബരിമല സ്ത്രീ പ്രവേശനവുമായി ബന്ധപ്പെട്ടു കേരളത്തില്‍ വ്യാപകമായി അരങ്ങേറിയ കലാപങ്ങളെ തുടര്‍ന്ന് സഊദിയടക്കമുള്ള അറബ് രാജ്യങ്ങളില്‍ നിന്നും കേരത്തിലേക്കുള്ള വിനോദ സഞ്ചാരികള്‍ യാത്ര മുടക്കിയത് വിനോദ സഞ്ചാര മേഖലക്ക് കനത്ത തിരിച്ചടി. വിവിധ അന്താരാഷ്ട്ര മാധ്യമങ്ങളിലടക്കം കേരളത്തില്‍
വ്യാപകമായി അരങ്ങേറിയ അക്രമ സംഭവങ്ങളെ കുറിച്ചുള്ള വാര്‍ത്തകള്‍ പ്രചരിച്ചതോടെ യാത്രകള്‍ ഒഴിവാക്കിയതായാണ് റിപ്പോര്‍ട്ടുകള്‍. ഹര്‍ത്താല്‍ ദിനത്തിലും തുടര്‍ന്നും അരങ്ങേറിയ സംഘര്‍ഷത്തിന്റെ ഫോട്ടോകളും വീഡിയോകളും വിവിധ അറബ് മാധ്യമങ്ങളും സോഷ്യല്‍ മീഡിയകളിലും പ്രചരിച്ചതോടെ ഭയപ്പെട്ടാണ് യാത്ര പ്ലാന്‍ ചെയ്ത സഊദികളടക്കം വിനോദ സഞ്ചാരികള്‍ കേരളം ഒഴിവാക്കി മറ്റു രാജ്യങ്ങളിലേക്ക് യാത്ര ഒരുക്കിയത്.
അക്രമ സംഭവങ്ങളെ തുടര്‍ന്ന് സഊദിയുടെ മുംബൈ കോണ്‍സുലേറ്റും തങ്ങളുടെ പൗരന്മാര്‍ക്ക് ജാഗ്രതാ നിര്‍ദേശവും നല്‍കുകയും കേരളത്തിലേക്ക് യാത്ര പോകരുതെന്ന നിര്‍ദേശത്തോടൊപ്പം നിലവില്‍ ഇവിടെയുള്ളവര്‍ക്ക് അടിയന്തിര സാഹചര്യങ്ങളില്‍ ബന്ധപ്പെടാന്‍ ഫോണ്‍ നമ്പര്‍ സഹിതം അറിയിപ്പ് പുറപ്പെടുവിച്ചതോടെ കൂടുതല്‍ സഊദികള്‍ യാത്ര വെട്ടി റദ്ദാക്കിയതായി ടൂറിസം മേഖലയില്‍ പ്രവര്‍ത്തിക്കുന്നവര്‍ വ്യക്തമാക്കി.
സഊദി സ്‌കൂളുകളില്‍ 15 ദിവസത്തെ ഇടക്കാല അവധി ആരംഭിച്ചതോടെ നിരവധി കുടുംബങ്ങള്‍ വിനോദ സഞ്ചാരത്തിനായി തയ്യാറായിരുന്നു. സീസണ്‍ നോക്കി ബുക്ക് ചെയ്ത സഊദി കുടുംബങ്ങളില്‍ കേരളം ഒഴിവാക്കി പകരം തെരഞ്ഞെടുത്ത്? ശ്രീലങ്കയും ഇന്തോനേഷ്യയുമാണ്?. റിയാദിലെ ഒരു ട്രാവല്‍ ഏജന്‍സിയില്‍ മാത്രം കേരളത്തിലേക്ക് ബുക്ക് ചെയ്ത സഊദി കുടുംബങ്ങളില്‍ 23 ല്‍ 18 കുടുംബങ്ങളും ടിക്കറ്റുകള്‍ ശ്രീലങ്കയിലേക്ക് മാറ്റിയിട്ടുണ്ട്. ഇതിനു മുന്‍പ് നിപ്പ വൈറസ് ഭീഷണി സമയത്താണ് ടൂറിസ്റ്റുകള്‍ കേരളത്തിലേക്കുള്ള യാത്രകള്‍ റദ്ദ് ചെയ്തത്.