മഞ്ചേരി: കേരള ആരോഗ്യ സര്‍വകലാശാല നോര്‍ത്ത് സോണ്‍ കലോത്സവത്തിന് ഇന്ന് കൊടിയിറക്കം. മഞ്ചേരി ഗവ.മെഡിക്കല്‍ കോളജില്‍ നടക്കുന്ന കലോത്സവത്തില്‍ 52 ഇനങ്ങള്‍ പൂര്‍ത്തിയായപ്പോള്‍ 100 പോയിന്റുമായി മഞ്ചേരി ഗവ.മെഡിക്കല്‍ കോളജ് മുന്നിട്ടു നില്‍ക്കുന്നു.
61 പോയിന്റ് നേടി ഗവ.ആയുര്‍വേദ കോളജ് പരിയാരം രണ്ടാം സ്ഥാനത്തും 28 പോയിന്റ് വീതം നേടി പി.എന്‍ പണിക്കര്‍ ആയുര്‍വേദ കോളജും എം.വി.ആര്‍ ആയുര്‍വേദ മെഡിക്കല്‍ കോളജും മൂന്നാം സ്ഥാനത്തുമാണ്. കോഴിക്കോട് ഗവ.മെഡിക്കല്‍ കോളജ് നാലും കോഴിക്കോട് ഗവ.നഴ്‌സിങ് കോളജ് അഞ്ചും സ്ഥാനത്തുണ്ട്. പോയിന്റ് നിലയില്‍ വ്യക്തമായ ആധിപത്യമാണ് മഞ്ചേരി മെഡിക്കല്‍ കോളജ് പുലര്‍ത്തുന്നത്.
കോല്‍ക്കളിയില്‍
മഞ്ചേരി
മഞ്ചേരി: വീശിയടിക്കുന്ന കാറ്റിനേക്കാള്‍ വേഗതയുണ്ടായിരുന്നു കോല്‍ക്കളി സംഘത്തിന്റെ നീക്കങ്ങള്‍ക്ക്. മാപ്പിള ഇശലിന്റെ തേന്‍മഴ പെയ്യുന്ന നാട്ടില്‍ മിന്നായം കണക്കെ മെയ് വഴക്കത്തോടെ കോലടിച്ച സംഘങ്ങള്‍ കലാ നഗരിക്ക് സമ്മാനിച്ചത് അത്ഭുതവും അമ്പരപ്പും. ഗുരുക്കന്‍മാരുടെ ശിക്ഷണത്തിന് പകരം സ്വന്തമായി ആര്‍ജിച്ചെടുത്ത കഴിവുകള്‍ അരങ്ങില്‍ തെളിയിച്ച മഞ്ചേരി ഗവ.മെഡിക്കല്‍ കോളജ് ടീം ഒന്നാം സ്ഥാനം നേടി.