പട്ടിക്കാട്: കേരള ഗവര്‍ണര്‍ മുഹമ്മദ് ആരിഫ്ഖാനെ ഭരണഘടനയുമായി ബന്ധപ്പെട്ട വിഷയങ്ങളില്‍ സംവാദത്തിന് വെല്ലുവിളിച്ച് കോണ്‍ഗ്രസ് നേതാവ് കബില്‍ സിബല്‍. പട്ടിക്കാട് ജാമിഅ നൂരിയ അറബിക് കോളജിന്റെ സനദ്ദാന സമ്മേളനത്തില്‍ സംസാരിക്കുകയായിരുന്നു അദ്ദേഹം. ഭരണഘടന സംബന്ധിച്ച് കൂടുതല്‍ കാര്യങ്ങള്‍ തനിക്ക് ഗവര്‍ണര്‍ക്ക് പറഞ്ഞുകൊടുക്കാനാകും. ഭരണ നിര്‍വഹണപരമായ കാര്യങ്ങളില്‍ ഗവര്‍ണര്‍ക്ക് ഒരു പങ്കും വഹിക്കാനില്ല. ഗവര്‍ണര്‍ ഭരണഘടന വായിക്കുകയാണങ്കില്‍ ഇക്കാര്യം മനസിലാകുമെന്നും കബില്‍ സിബല്‍ പറഞ്ഞു.

ഹിറ്റ്‌ലറുടെ അജന്‍ഡയാണ് മോദി സര്‍ക്കാര്‍ നടപ്പാക്കുന്നത്. യൂനിവേഴ്‌സിറ്റികളെയും മാധ്യമങ്ങളെയും നിശബ്ദമാക്കിയിരിക്കുന്നു. ഭരണകൂടത്തിനെതിരേ ചിന്തിക്കുന്നവരെ നിശബ്ദമാക്കാനാണ് യൂണിവേഴ്‌സിറ്റികള്‍ കയ്യടക്കാന്‍ ശ്രമിക്കുന്നതിലൂടെ ശ്രമിക്കുന്നത്.

ഇന്ത്യയുടെ അടിസ്ഥാന ഭരണഘടനാ സംവിധാനം ആര്‍ക്കും നശിപ്പിക്കാനാവില്ല. വിജ്ഞാനമാണ് പിന്നീട് നിക്ഷേപവും പ്രൊഡക്ടുമായി സമൂഹത്തില്‍ പുറത്തിറങ്ങുന്നത്.
യുണിവേഴ്‌സിറ്റികളുടെ ഘടന തകര്‍ക്കാനാണ് മോഡി സര്‍ക്കാര്‍ ശ്രമിക്കുന്നത്. കേരളത്തില്‍ ഗവര്‍ണര്‍ നിയമ സഭയെ മറികടന്നു കേന്ദ്ര സര്‍ക്കാരിന് ഒത്താശ ചെയ്യുകയാണ്.
ഈ ഗവണ്മെന്റ് ആരെയും കേള്‍ക്കാന്‍ തയ്യാറാവുന്നില്ല. ചിലരെ രാജ്യത്തിന്റെ പൗരന്മാര്‍ അല്ലാതാക്കുന്നു. ഞാനും ഒരു അഭയാര്‍ത്ഥിയാണ്. എന്റെ പിതാവ് പാകിസ്ഥാനില്‍ നിന്നു കുടിയേറിയവനാണ്. ഡോക്യുമെന്റ്‌സ് ഒന്നും ആര്‍ക്കും കണ്ടെത്താന്‍ കഴിയില്ല. ഇന്ത്യന്‍ സൈനികനായിരുന്ന സനാഉല്ല യുടെ കുടുംബത്തിനും സംഭവിച്ചതും ഇത് തന്നെ. പ്രധാനമന്ത്രിയും സര്‍ക്കാരും ജനങ്ങളെ വിഡ്ഢികള്ക്കായാണെന്നും അദ്ദേഹം കൂട്ടിച്ചേര്‍ത്തു.