ദോഹ: ഇറാന്‍ ഒരു യുദ്ധത്തിന് ആഗ്രഹിക്കുന്നില്ലെന്നും സമാധാനം നിലനിര്‍ത്താനാണ് തങ്ങളുടെ സ്രമമെന്നും വ്യക്തമാക്കി പ്രസിഡന്റ് മസൂദ് പെസഷ്‌കിയാന്‍. അതേസമയം തങ്ങളുടെ രാജ്യത്തിന് നേരെ തിരിഞ്ഞാല്‍ പ്രതികരിക്കാതിരിക്കില്ലെന്നും അദ്ദേഹം വ്യക്തമാക്കി. ദോഹയില്‍ ഖത്തര്‍ അമീറുമായി നടത്തിയ കൂടിക്കാഴ്ചക്കുശേഷമായിരുന്നു ഇറാന്‍ പ്രസിഡന്റിന്റെ പ്രതികരണം.

'സമാധാനം നിലനിര്‍ത്താനാണ് ഞങ്ങളുടെ ശ്രമം. എന്നാല്‍, പ്രതികരിക്കാന്‍ ഇസ്‌റാഈല്‍ ഞങ്ങളെ നിര്‍ബന്ധിതരാക്കുന്നു.  അദ്ദേഹം ചൂണ്ടിക്കാട്ടി. 

ഹമാസ് നേതാവ് ഇസ്മാഈല്‍ ഹനിയ്യയെ ഞങ്ങളുടെ മണ്ണില്‍ കൊലപ്പെടുത്തിയപ്പോള്‍ യൂറോപ്പും അമേരിക്കയും ഞങ്ങളോട് സമാധാനം പാലിക്കാനാവശ്യപ്പെട്ടു. സമാധാനത്തിനുവേണ്ടി ഞങ്ങള്‍ ആത്മസംയമനം പാലിച്ചു. എന്നാല്‍, ഇസ്‌റാഈല്‍ വീണ്ടും ഞങ്ങളെ പ്രകോപിപ്പിക്കുകയായിരുന്നു' പെസഷ്‌കിയാന്‍ പറഞ്ഞു.
 
ഗസ്സയിലും ലബനാനിലുമായി ഇസ്‌റാഈല്‍ തുടരുന്ന ആക്രമണങ്ങള്‍ മേഖലയെ ഒന്നാകെ സംഘര്‍ഷ ഭീതിയിലാക്കിയതായി ഖത്തര്‍ അമീര്‍ ശൈഖ് തമീം ബിന്‍ ഹമദ് ആല്‍ഥാനിയും ചൂണ്ടിക്കാട്ടി. യുദ്ധം അവസാനിപ്പിക്കാനും മേഖലയുടെ സമാധാനം ഉറപ്പാക്കാനും ഇസ്‌റാഈലിനുമേല്‍ അന്താരാഷ്ട്ര സമൂഹത്തിന്റെ സമ്മര്‍ദം ശക്തമാക്കണമെന്നും ലോകരാജ്യങ്ങള്‍ തങ്ങളുടെ ഉത്തരവാദിത്തം നിറവേറ്റണമെന്നും അമീര്‍ ശക്തമായ ഭാഷയില്‍ വ്യക്തമാക്കി. ഈ യുദ്ധം അവസാനിപ്പിക്കാനും വെടിനിര്‍ത്തല്‍ സാധ്യമാക്കാനുമുള്ള മധ്യസ്ഥ ശ്രമം അവസാന ഘട്ടം വരെ ഖത്തര്‍ തുടരും അമീര്‍ പറഞ്ഞു.

ഗസ്സയില്‍ ഇസ്‌റാഈല്‍ ആക്രമണം ആരംഭിച്ച ആദ്യഘട്ടം മുതല്‍ യുദ്ധം ലബനാനിലേക്ക് വ്യാപിക്കുമെന്ന് ഖത്തര്‍ മുന്നറിയിപ്പു നല്‍കിയിരുന്നു.