കുമളി: പച്ചക്കറി വിത്ത് വ്യാപാരത്തിന്റെ മറവില്‍ കഞ്ചാവ് കച്ചവടം നടത്തിയിരുന്ന തമിഴ്‌നാട് സ്വദേശിയെ പൊലിസ് അറസ്റ്റു ചെയ്തു.
കോയമ്പത്തൂര്‍ ജില്ലയിലെ പൊള്ളാച്ചി കരിംപാളയം തെരുവില്‍ മതിയഴകന്‍(48) ആണ് അറസ്റ്റിലായത്. ഇന്നലെ രാവിലെ കുമളി പഞ്ചായത്ത് ബസ്റ്റാന്റിന് സമീപത്ത് വെച്ചാണ്  കുമളി എസ് ഐ ടി.ഡി പ്രജീഷ് അറസ്റ്റു ചെയ്തത്.  ഇയാളുടെ മടിയില്‍ നിന്നും നാലു പാക്കറ്റുകളിലായി സൂക്ഷിച്ചിരുന്ന 20 ഗ്രാം കഞ്ചാവ് പൊലിസ് കണ്ടെടുത്തു.
കഴിഞ്ഞ ഏതാനും വര്‍ഷങ്ങളായി മതിയഴകന്‍ കുമളി ടൗണിലും പരിസരത്തുമായി പച്ചക്കറി വിത്ത് വില്‍പ്പന നടത്തുന്നയാളാണ്. ഇയാള്‍ കഞ്ചാവ് വില്‍പ്പന നടത്തുന്നുണ്ടെന്ന വിവരം മുമ്പ് പൊലിസിന് ലഭിച്ചിരുന്നു. ഇതിനാല്‍ ഇയാള്‍ നിരീക്ഷണത്തിലായിരുന്നു.പ്രതിയെ പീരുമേട് കോടതിയില്‍ ഹാജരാക്കി.