തിരുവനന്തപുരം: ഒക്ടോബറില്‍ നടക്കുന്ന തദ്ദേശ തെരഞ്ഞെടുപ്പിനുള്ള വോട്ടര്‍പട്ടിക പുതുക്കുന്നതിനുള്ള കരട് ഇന്ന് പ്രസിദ്ധീകരിക്കും.
കരട് വോട്ടര്‍പട്ടിക സംബന്ധിച്ച അപേക്ഷകളും ആക്ഷേപങ്ങളും ഇന്നു മുതല്‍ ഫെബ്രുവരി 14 വരെ ഇലക്ടറല്‍ രജിസ്‌ട്രേഷന്‍ ഓഫിസര്‍മാര്‍ക്ക് സമര്‍പ്പിക്കാം.
അന്തിമ വോട്ടര്‍പട്ടിക ഫെബ്രുവരി 28ന് പ്രസിദ്ധീകരിക്കും. സംസ്ഥാനത്തെ 941 പഞ്ചായത്തുകളിലെയും 86 മുനിസിപ്പാലിറ്റികളിലെയും ആറ് മുനിസിപ്പല്‍ കോര്‍പറേഷനുകളിലെയും വോട്ടര്‍പട്ടികയാണ് പുതുക്കുന്നത്.
2020 ജനുവരി ഒന്നിനോ അതിനു മുന്‍പോ 18 വയസ് തികഞ്ഞവര്‍ക്ക് വോട്ടര്‍പട്ടികയില്‍ പേരുചേര്‍ക്കാം. തിരുത്തലുകള്‍, സ്ഥാനമാറ്റം എന്നിവയ്ക്കും അവസരം ലഭിക്കും. പുതിയതായി പേര് ഉള്‍പ്പെടുത്തുന്നതിനും (ഫോം 4) തിരുത്തുന്നതിനും (ഫോം 6) പോളിങ് സ്റ്റേഷന്‍ വാര്‍ഡ് മാറ്റത്തിനും (ഫോം 7) ഓണ്‍ലൈന്‍ അപേക്ഷ സമര്‍പ്പിക്കണം. പേര് ഒഴിവാക്കുന്നതിന് ഫോം അഞ്ചില്‍ നേരിട്ടോ തപാലിലൂടെയോ സമര്‍പ്പിക്കാം.
ഓണ്‍ലൈന്‍ അപേക്ഷകള്‍ ംംം.ഹഴെലഹലരശേീി.സലൃമഹമ.ഴീ്.ശി എന്ന വെബ്‌സൈറ്റ് വഴിയാണ് സമര്‍പ്പിക്കേണ്ടത്. പട്ടിക എല്ലാ തദ്ദേശസ്വയംഭരണ സ്ഥാപനങ്ങള്‍, വില്ലേജ് ഓഫിസുകള്‍, താലൂക്ക് ഓഫിസുകള്‍, വെബ്‌സൈറ്റ് എന്നിവയില്‍ ലഭ്യമാണ്.
പഞ്ചായത്ത്, നഗരസഭകളില്‍ സെക്രട്ടറിമാരും കോര്‍പറേഷനുകളില്‍ അഡിഷനല്‍ സെക്രട്ടറിമാരുമാണ് ഇലക്ടറല്‍ രജിസ്‌ട്രേഷന്‍ ഓഫിസര്‍മാര്‍.
അപേക്ഷകളും ആക്ഷേപങ്ങളും സംബന്ധിച്ച് ഇലക്ടറല്‍ രജിസ്‌ട്രേഷന്‍ ഓഫിസര്‍മാര്‍ സ്വീകരിക്കുന്ന നടപടിക്കെതിരേ നിശ്ചിത ദിവസത്തിനകം അപ്പീലുകള്‍ സമര്‍പ്പിക്കാം.
പഞ്ചായത്തുകളെ സംബന്ധിച്ച് പഞ്ചായത്ത് ഡപ്യൂട്ടി ഡയരക്ടര്‍മാരും മുനിസിപ്പാലിറ്റി, കോര്‍പറേഷന്‍ സംബന്ധിച്ച് നഗരകാര്യ റീജനല്‍ ഡയരക്ടര്‍മാരുമാണ് അപ്പീല്‍ അധികാരികള്‍.