ഭുവനേശ്വര്‍: ഐ ലീഗില്‍ ഇന്ത്യന്‍ ആരോസിനെ ഒന്നിനെതിരേ രണ്ട് ഗോളുകള്‍ക്ക് പരാജയപ്പെടുത്തി ഈസ്റ്റ് ബംഗാള്‍. ഒഡിഷയിലെ കലിങ്ക സ്റ്റേഡിയത്തില്‍ നടന്ന മത്സരത്തില്‍ സ്വന്തം കാണികള്‍ക്ക് മുന്‍പില്‍ പൊരുതിയാണ് ഇന്ത്യന്‍ ആരോസ് കീഴടങ്ങിയത്.
26ാം മിനുട്ടില്‍ ലാല്‍ഡന്‍മാവിയ റാള്‍ട്ടെയും 64ാം മിനുട്ടില്‍ ജസ്റ്റിന്‍ ജോബിനുമാണ് ഈസ്റ്റ് ബംഗാളിന് വേണ്ടി ഗോള്‍ നേടിയത്. കളി അവസാനിക്കാനിരിക്കെ 90ാം മിനുട്ടില്‍ നിന്തോയ്ങ്കന്‍ബ മീത്തെയ് പെനാല്‍റ്റിയിലൂടെ ആരോസിന് വേണ്ടി ഒരു ഗോള്‍ മടക്കി. 56ാം മിനുട്ടില്‍ പ്രതിരോധ താരം ലാല്‍റാംചുല്ലോവ ചുവപ്പ് കാര്‍ഡ് കണ്ട് പുറത്ത് പോയതിനാല്‍ 10 പേരുമായിട്ടാണ് ഈസ്റ്റ് ബംഗാള്‍ കളിച്ചത്. 84ാം മിനുട്ടില്‍ രണ്ടാം മഞ്ഞക്കാര്‍ഡ് ലഭിച്ച് ഇന്ത്യന്‍ ആരോസ് മുന്നേറ്റനിര താരം അനികേത് യാദവും പുറത്ത് പോയിരുന്നു.
10 കളികളില്‍നിന്ന് ആറ് ജയവും ഒരു സമനിലയും മൂന്ന് തോല്‍വിയുമായി 19 പോയിന്റോടെ ലീഗില്‍ അഞ്ചാം സ്ഥാനത്താണ് ഈസ്റ്റ് ബംഗാള്‍. 11 മത്സരങ്ങള്‍ കളിച്ച ഇന്ത്യന്‍ ആരോസ് മൂന്ന് ജയവും ഒരു സമനിലയും ഏഴ് തോല്‍വിയുമടക്കം 10 പോയിന്റുമായി ഒന്‍പതാം സ്ഥാനത്തും നിലകൊള്ളുന്നു.