ലണ്ടന്‍: ലണ്ടന്‍ പൊലിസിന്റെ 188 വര്‍ഷത്തെ ചരിത്രത്തിലാദ്യമായി ഒരു വനിതാ ഉദ്യോഗസ്ഥ സേനയുടെ തലപ്പത്തെത്തുന്നു. ഭീകരവാദ വിരുദ്ധ ഓപറേഷന്‍ വിദഗ്ധയായ ക്രസീദ ഡിക്കിനെയാണ് ബ്രിട്ടീഷ് സര്‍ക്കാര്‍ ലണ്ടന്‍ പൊലിസ് സേനയുടെ മേധാവിയായി തിരഞ്ഞെടുത്തിരിക്കുന്നത്.
56കാരിയായ ഡിക്ക് രാജ്യത്തെ തന്നെ ഏറ്റവും മുതിര്‍ന്ന പൊലിസ് ഉദ്യോഗസ്ഥ കൂടിയാണ്. 43,000ത്തോളം വരുന്ന ഉദ്യോഗസ്ഥരുടെ ചുമതലയുള്ള മെട്രോപൊളിറ്റന്‍ പൊലിസ് കമ്മിഷണറുടെ പദവിയിലേക്കാണ് അവര്‍ തിരഞ്ഞെടുക്കപ്പെട്ടിരിക്കുന്നത്.
ഓക്‌സ്‌ഫോഡ് സര്‍വകലാശാലാ ബിരുദധാരിണിയാണ് ഡിക്ക്. ബെര്‍നാഡ് ഹോഗന്‍ ഹൊവേ പദവിയൊഴിഞ്ഞ ഒഴിവിലേക്ക് ആഭ്യന്തര സെക്രട്ടറിയുടെ നിര്‍ദേശപ്രകാരമാണ് എലിസബത്ത് രാജ്ഞി അവരെ കമ്മിഷണറായി പ്രഖ്യാപിച്ചത്.