മെല്‍ബണ്‍: മുന്‍ ആസ്‌ത്രേലിയന്‍ ഓപ്പണ്‍ കിരീടജേത്രി റഷ്യയുടെ മരിയ ഷറപ്പോവ ടൂര്‍ണമെന്റിന്റെ ആദ്യ റൗണ്ടില്‍ തന്നെ പുറത്തായപ്പോള്‍ മറ്റു ലോക താരങ്ങള്‍ ജയിച്ച് മുന്നേറി. ബ്രിട്ടന്റെ ജോഹന്ന കോന്റയും തോറ്റ് പുറത്തായി.
സൂപ്പര്‍ താരങ്ങളായ റാഫേല്‍ നദാലും മരിന്‍ സിലിച്ചും നാലാം നമ്പര്‍ താരം ഡനില്‍ മെഡ്‌വദേവും അഞ്ചാം നമ്പര്‍ താരം ഡൊമിനിക് തീമും ഏഴാം നമ്പര്‍ താരം അലക്‌സാണ്ടര്‍ സെറേവും ഒന്‍പതാം നമ്പര്‍ താരം ബൗറ്റിസ്റ്റ അഗട്ടും 11ാം നമ്പര്‍ താരം ഡേവിഡ് ഗോഫിനും വനിതകളില്‍ മൂന്നാം നമ്പര്‍ താരം സിമോണ ഹാലെപ്പും അഞ്ചാം നമ്പര്‍ താരം എലീന സ്വിറ്റോളിനയും 15ാം താരം കരോളിന പ്ലിസ്‌കോവയും മാഡിസന്‍ കീസും യെലേന ഒസ്റ്റപെങ്കോയും ഗാര്‍ബൈന്‍ മുഗുരുസയും ആഞ്ചലിക് കെര്‍ബറും രണ്ടാം റൗണ്ടിലേക്ക് മുന്നേറി.
2008ലെ കിരീടജേത്രിയും 2007, 2012, 2015ലെ ഫൈനലിസ്റ്റുമായ ഷറപ്പോവ നിലവിലെ 20ാം നമ്പര്‍ ക്രൊയേഷ്യന്‍ താരം ഡോണ വേക്കിച്ചിനോടാണ് പരാജയമേറ്റുവാങ്ങിയത്. സ്‌കോര്‍ 6-3, 6-4. ടുണീഷ്യയുടെ ഓണ്‍സ് ജബിയറിനെതിരെയാണ് 13ാം നമ്പര്‍ താരമായ കോന്റ പരാജയപ്പെട്ടത്. സ്‌കോര്‍ 6-4, 6-2.
അതേസമയം, ക്രിസ്റ്റിന മ്ലദനോവിച്ചിനെ 6-1, 7-5 എന്ന സ്‌കോറിനാണ് പ്ലിസ്‌കോവ മറികടന്നത്. ആറാം സീഡ് ബെലിന്‍ഡ ബെന്‍സിച്ച് അന്ന കരോലിനയെ 6-3, 7-5 എന്ന സ്‌കോറിനും പരാജയപ്പെടുത്തി.
പുരുഷന്‍മാരില്‍ ലോക 73ാം നമ്പര്‍ ബൊളീവിയന്‍ താരം ഹ്യുഗോ ഡെല്ലിയനെ നേരിട്ടുള്ള മൂന്ന് സെറ്റുകള്‍ക്കാണ് നദാല്‍ തോല്‍പ്പിച്ചത്. സ്‌കോര്‍ 6-2, 6-3, 6-0. ഗ്രീസിന്റെ സ്റ്റെഫാനോസ് സിറ്റ്‌സിപാസും അടുത്തറൗണ്ടിലെത്തി.