വടക്കാഞ്ചേരി: ഷൊര്‍ണൂര്‍ - കൊടുങ്ങല്ലൂര്‍ സംസ്ഥാന പാതയില്‍ മിണാലൂര്‍ ബൈപാസ് വളവില്‍ വന്‍ അഗ്‌നിബാധ. ജനവാസ മേഖലയോട് ചേര്‍ന്ന നിരവധി സ്ഥാപനങ്ങള്‍ പ്രവര്‍ത്തിക്കുന്നതിനോട് തൊട്ടുള്ള സ്വകാര്യ വ്യക്തിയുടെ പറമ്പിലാണ് ഇന്നലെ കാലത്ത് 10 ഓടെ തീ പടര്‍ന്നത്. ഏക്കര്‍ കണക്കിന് സ്ഥലത്തെ അടിക്കാടുകളും, ഏതാനും മരങ്ങളും കത്തിയമര്‍ന്നു. വടക്കാഞ്ചേരിയില്‍ നിന്നെത്തിയ അഗ്‌നിശമന സേന ഒരു മണിക്കൂറോളം നീണ്ട പരിശ്രമത്തിനൊടുവിലാണ് തീ അണച്ചത്. ചെങ്കുത്തായ ഭൂമിയും പാറ കൂട്ടങ്ങളുമൊക്കെ രക്ഷാപ്രവര്‍ത്തനം ദുഷ്‌കരമാക്കി. ജനവാസ മേഖലയിലേക്ക് തീ പടരാതിരുന്നത് വന്‍ അപകടം ഒഴിവാക്കി. വലിയ തോതില്‍ ഉയര്‍ന്ന പുകപടലം പണിമുടക്ക് ദിനത്തിലും സംസ്ഥാന പാതയിലൂടെ കടന്ന് പോയിരുന്ന വാഹനയാത്രക്കാര്‍ക്ക് ദുരിതമായി. രക്ഷാപ്രവര്‍ത്തനത്തില്‍ നാട്ടുകാരും കണ്ണികളായി.