ആരോഗ്യമാണ് സന്തോഷകരമായ ജീവിതത്തിലേക്കുള്ള വഴി. ആരോഗ്യകാര്യങ്ങളില്‍ ശ്രദ്ധ പുലര്‍ത്തേണ്ടതിന്റെ ആവശ്യകതയെക്കുറിച്ച് പ്രവാചകന്‍ വിശ്വാസികളോട് പറയുന്നുണ്ട്. ആരോഗ്യകരമായ ജീവിതത്തിന് ആവശ്യമായ സമീകൃത ആഹാരം, കൃത്യമായ ശാരീരിക, മാനസിക വ്യായാമം എന്നിവയുടെ പ്രാധാന്യവും പറയുന്നുണ്ട്. 

ശരിയായ ആഹാരക്രമത്തിലൂടെ ശാരീരികാരോഗ്യം മെച്ചപ്പെടുത്താവുന്ന സമയമാണ് നോമ്പുകാലം. വ്രതാനുഷ്ഠാനത്തിലൂടെ ജീവിതശൈലിയില്‍ ആവശ്യമായ നിയന്ത്രണങ്ങള്‍കൊണ്ടുവന്ന് അച്ചടക്കം പുലര്‍ത്താന്‍ സഹായിക്കും.
നോമ്പുകാല വ്രതം എന്നത് പ്രഭാതം മുതല്‍ പ്രദോഷം വരെ ഭക്ഷണത്തെയും പാനീയങ്ങളെയും പൂര്‍ണമായി ത്യജിക്കലാണ്. അസുഖ ബാധിതര്‍, ദുര്‍ബലര്‍, ഗര്‍ഭണികള്‍, ആര്‍ത്തവാവസ്ഥയിലുള്ള സ്ത്രീകള്‍, മുലയൂട്ടുന്ന അമ്മമാര്‍, യാത്രികര്‍ എന്നിവര്‍ വ്രതമനുഷ്ഠിക്കേണ്ടതില്ല. എന്നാല്‍ അത്രയും ദിവസങ്ങള്‍ പിന്നീട് ഉപവസിക്കണം. വ്രതാനുഷ്ഠാനത്തിലൂടെ ഉണ്ടാകുന്ന ആരോഗ്യ പ്രശ്‌നങ്ങള്‍ ഏവരുടെയും ആശങ്കയാണ്. എന്നാല്‍ ശരിയായ രീതിയിലുള്ള വ്രതാചരണത്തിലൂടെ ആരോഗ്യ പ്രശ്‌നങ്ങള്‍ ഉണ്ടാകില്ല എന്ന് മാത്രമല്ല, ആരോഗ്യം മെച്ചപ്പെടുത്താവുന്നതുമാണ്. ഭക്ഷണം കഴിച്ച് എട്ട് മണിക്കൂറിന് ശേഷമാണ് ശരീരം ഉപവാസത്തിലേക്ക് കടക്കുക.

ഭക്ഷണത്തിലുള്ള പോഷകങ്ങള്‍ ആമാശയം വലിച്ചെടുത്തതിനു ശേഷം, ഊര്‍ജോല്‍പ്പാദനത്തിനായി ആദ്യം കരളിലും പേശികളിലുമായുള്ള ഗ്ലൂക്കോസിനെ ആശ്രയിക്കുന്നു. ശേഷം കൊഴുപ്പിനെയും. ഒപ്പം, കരളിലും മറ്റുമായി, ചെറിയ തോതില്‍ ഗ്ലൂക്കോസ് ഉത്പാദനവും നടത്തുന്നു. ഇതിനുശേഷം മാത്രമാണ് ശരീരത്തിലെ പ്രോട്ടീന്‍ ഊര്‍ജ്ജോല്‍പ്പാദനത്തിനായി ഉപയോഗിക്കുക.
ദിവസങ്ങളോ ആഴ്ച്ചകളോ നീണ്ട ഉപവാസം മാത്രമേ ഇങ്ങനൊരവസ്ഥയിലേക്ക് നയിക്കുകയുള്ളു. ഈ അവസ്ഥയാണ് ശരീരത്തെ ദോഷകരമായി ബാധിക്കുക. റമദാന്‍ വ്രതാനുഷ്ഠാനത്തില്‍ വിശ്വാസി ഏതാനും മണിക്കൂറുകള്‍ മാത്രമാണ് ഉപവാസം അനുഷ്ഠിക്കുന്നത്. അതുകൊണ്ട് തന്നെ വ്രതാനുഷ്ഠാനത്തിലൂടെ ശരീരത്തിനാവശ്യമില്ലാത്ത കൊഴുപ്പ്് നശിച്ച് ആരോഗ്യം ദൃഢമാക്കുന്നു.