കല്‍പ്പറ്റ: വയനാട് പ്രീമിയര്‍ ലീഗ് ഫുട്‌ബോളില്‍ ക്വാര്‍ട്ടര്‍ സാധ്യതകള്‍ നിലനിര്‍ത്തി സാസ്‌ക് സുഗന്ധഗിരി. തങ്ങളുടെ രണ്ടാം മത്സരത്തില്‍ വയനാട് ഫാല്‍ക്കന്‍സിനെ മറുപടിയില്ലാത്ത രണ്ടു ഗോളുകള്‍ക്ക് പരാജയപ്പെടുത്തിയാണ് സാസ്‌ക് ക്വാര്‍ട്ടര്‍ സാധ്യത സജീവമാക്കിയത്. കളിയുടെ ആദ്യ പകുതിയില്‍ ഇരു ടീമുകളും ആക്രമണങ്ങള്‍ കനപ്പിച്ചതോടെ കളി ആവേശം നിറഞ്ഞതായി. ആദ്യ മുന്നേറ്റം ഫാല്‍ക്കന്‍സാണ് നടത്തിയത്.
ഫാല്‍ക്കന്‍സിന്റെ സുമേഷ് സാസ്‌ക് പോസ്റ്റിലേക്ക് പായിച്ച ഷോട്ട് ഇഞ്ചുകള്‍ക്ക് പുറത്ത് പോയി. തൊട്ടടുത്ത നിമിശം ഫാല്‍ക്കന്‍സിന്റെ റാശിദും സാസ്‌ക് ഗോള്‍കീപ്പര്‍ ബഷീറിനെ പരീക്ഷിച്ചു. എന്നാന്‍ ഗോള്‍കീപ്പര്‍ ഇത് സമര്‍ഥമായി പിടിച്ചെടുത്തു. മറുഭാഗത്ത് സാസ്‌കിന്റെ മുന്നേറ്റ താരം കുമ്മിന്‍സ് രണ്ടും കല്‍പ്പിച്ചായിരുന്നു. 12 മിനിറ്റില്‍ കുമിന്‍സിന്റെ മികച്ച ഒരു ഷോട്ട് പോസ്റ്റിലിടിച്ച് മടങ്ങി.
ഫാല്‍ക്കന്‍സ് ബോക്‌സില്‍ ഉണ്ടായ കൂട്ടപ്പൊരിച്ചിലില്‍ പന്ത് പിടിച്ചെടുത്ത് മുന്നേറിയ ഫാല്‍ക്കന്‍സ് താരങ്ങള്‍ സാസ്‌ക് ഗോള്‍ മുഖത്ത് ഭീതി വിതച്ചെങ്കിലും ഗോളിയെ മറികടക്കാനായില്ല. കുമ്മിന്‍സിന്റ മുന്നേറ്റങ്ങളുടെ മുനയൊടിച്ച് ഫാല്‍ക്കന്‍സ് ഗോളി മുന്‍ കേരള താരം ജീന്‍ ക്രിസ്റ്റിന്‍ പാറപോലെ ഉറച്ചു നിന്നത് അവര്‍ക്ക് പലപ്പോഴും രക്ഷയായി. എന്നാല്‍ കളിയുടെ 21-ാം മിനിറ്റില്‍ ഫാല്‍ക്കന്‍സിന്റെ വല കുലുക്കി. അധ്യാനിച്ച് കളിച്ച കുമ്മിന്‍സായിരുന്നു ഗോള്‍ സ്‌കോറര്‍. ബോക്‌സിന്റെ വലതു ഭാഗത്തു നിന്നും ജലീല്‍ എടുത്ത ഫ്രീ കിക്ക് കാലില്‍ കൊരുത്ത് കുമ്മിന്‍സ് പ്രതിരോധക്കാര്‍ക്കിടയിലൂടെ വലയിലാക്കി. പ്രത്യാക്രമണം ഫാല്‍ക്കന്‍സ് ശക്തമാക്കിയെങ്കിലും സാസ്‌ക് ഗോള്‍ കീപ്പര്‍ ബഷീറിനെ മറികടക്കനായില്ല. ഇടവേളക്ക് പിരിയുമ്പോള്‍ ഒരു ഗോളിന് മുന്നിലായിരുന്നു സാസ്‌ക്. രണ്ടാം പകുതിയില്‍ ഫാല്‍ക്കന്‍സിന്റെ മുന്നേറ്റത്തിന് ശക്തിയുണ്ടായിരുന്നില്ല. എന്നാല്‍ ആക്രമണം കനപ്പിച്ച സാസ്‌ക് രണ്ടാം ഗോളും നേടി. 30-ാം മിനിറ്റില്‍ കുമ്മിന്‍സിന്റെ ഷോട്ട് ജീന്‍ രക്ഷപ്പെടുത്തിയെങ്കിലും റീബൗണ്ടില്‍ അനസ് ജീനിനെ മറികടന്നു. പിന്നീട് ഇരു ടീമുകളും മികച്ച മുന്നേറ്റങ്ങള്‍ നടത്തിയെങ്കിലും ഇരു ഗോള്‍കീപ്പര്‍മാരും വല കുലുങ്ങാതെ കാത്തു.
ഫൈനല്‍ വിസില്‍ മുഴങ്ങുമ്പോള്‍ സാസ്‌ക് വിജയത്തേടെ ക്വാര്‍ട്ടര്‍ പ്രതീക്ഷകള്‍ സജീവമാക്കി. കെ.എസ്.ഇ.ബി താരം പ്രിന്‍സ് പൗലോസടക്കം ഫാല്‍ക്കന്‍ നിരയില്‍ അണി നിരന്നിട്ടും അവര്‍ക്ക് സാസ്‌കിനെ മറി കടക്കാനായില്ല.
രണ്ടാം മത്സരത്തില്‍ ഡൈനാമോസ് അമ്പലവയല്‍ ഒന്നിനെതിരേ മൂന്ന് ഗോളുകള്‍ക്ക് ആസ്‌ക് ആറാം മൈലിനെ പരാജയപ്പെടുത്തി. ഡൈനാമോസിനായി അഖില്‍ രണ്ടും സി.സി ഒരു ഗോളും നേടി. അലക്‌സിയുടെ വകയായിരുന്നു ആസ്‌കിന്റെ ആശ്വാസ ഗോള്‍.