കൊച്ചി: വി.എസ് അച്യുതാനന്ദന്‍ മുഖ്യമന്ത്രിയായ സമയത്ത് ജീവപര്യന്തം ശിക്ഷ അനുഭവിക്കുന്ന 209 തടവുകാരെ ജയില്‍ മോചിതരാക്കിയ നടപടി ഹൈക്കോടതി റദ്ദാക്കി.

10 വര്‍ഷം ജയിലില്‍ കഴിഞ്ഞവര്‍ക്ക് ശിക്ഷായിളവ് നല്‍കി 2011 ഫെബ്രുവരി 18ന് സംസ്ഥാന സര്‍ക്കാര്‍ ശുപാര്‍ശയില്‍ ഗവര്‍ണര്‍ പുറപ്പെടുവിച്ച ഉത്തരവാണ് കോടതി റദ്ദാക്കിയത്. വധശിക്ഷ ലഭിക്കത്തക്ക കുറ്റം ചെയ്തവരെ 14 വര്‍ഷത്തെ ശിക്ഷാ കാലയളവ് കഴിഞ്ഞുമാത്രമേ വിട്ടയക്കാനാവൂവെന്ന നിയമം മറികടക്കാന്‍ സര്‍ക്കാരിനാവില്ലെന്ന് ചൂണ്ടിക്കാട്ടിയാണ് സര്‍ക്കാര്‍ ഉത്തരവ് റദ്ദാക്കിയത്.

വിട്ടയച്ചവരുടെ വിവരങ്ങള്‍ ആറുമാസത്തിനകം പരിശോധിച്ച് റിപ്പോര്‍ട്ട് സമര്‍പ്പിക്കാന്‍ ഗവര്‍ണര്‍ക്ക് കോടതി നിര്‍ദേശം നല്‍കി.

അര്‍ഹതയില്ലാത്തവര്‍ മോചിക്കപ്പെട്ടിട്ടുണ്ടെങ്കില്‍ ബാക്കിയുള്ള ശിക്ഷാകാലവധി കൂടി ജയിലില്‍ കഴിയണമെന്നും കോടതി ഉത്തരവില്‍ പറയുന്നു.

ബി.ജെ.പി പ്രവര്‍ത്തകനായ കെ.ടി ജയകൃഷ്ണന്‍ മാസ്റ്റര്‍ വധക്കേസിലെ 20പേരും വിട്ടയച്ചവരില്‍ ഉള്‍പ്പെടുന്നു.
തടവുകാരുടെ കാര്യത്തില്‍ അസാധാരണ കാരണങ്ങളുണ്ടെങ്കില്‍ പരിശോധിച്ച ശേഷം വിട്ടയക്കാവുന്നതാണ്. മതിയായ കാരണങ്ങള്‍ പരിശോധിച്ചായിരിക്കണം ശിക്ഷായിളവ് അനുവദിക്കാവൂവെന്നും കോടതി വ്യക്തമാക്കി.
2011 ലെ സര്‍ക്കാരിന്റെ ശുപാര്‍ശക്ക് അംഗീകാരം നല്‍കിയ ഗവര്‍ണര്‍ സമൂഹത്തിനും ഇരകള്‍ക്കും കുടുംബത്തിനുമുണ്ടാവുന്ന പ്രത്യാഘാതങ്ങള്‍ മുഖവിലയ്‌ക്കെടുത്തില്ലെന്നും കോടതി വ്യക്തമാക്കി.

കൊലപാതക കേസിലെ പ്രതിയായ പിതാവിന് 16 വര്‍ഷം കഴിഞ്ഞിട്ടും ശിക്ഷായിളവു ലഭിക്കാത്ത നടപടി ചോദ്യംചെയ്തു സമര്‍പ്പിച്ച ഹരജിയിലാണ് കോടതി ഉത്തരവ്. ചീഫ് ജസ്റ്റിസ് ഋഷികേശ് റോയി, ജസ്റ്റിസ് എ.കെ ജയശങ്കര്‍ നമ്പ്യാര്‍, ജസ്റ്റിസ് എബ്രഹാം മാത്യു എന്നിവരടങ്ങിയ ഫുള്‍ബെഞ്ചാണ് ഉത്തരവ് പുറപ്പെടുവിച്ചത്.
ജിന്‍സി, പി.ഡി ജോസഫ്, സാനി ഫ്രാന്‍സിസ് എന്നിവരാണ് വിവിധ കേസുകളിലെ ഹരജിക്കാര്‍.