തിരുവനന്തപുരം: കേരള യൂണിവേഴ്‌സിറ്റിയില്‍ നാല് വര്‍ഷ ബിരുദ കോഴ്‌സുകള്‍ക്ക് ഉയര്‍ന്ന പരീക്ഷ ഫീസ് ഏര്‍പ്പെടുത്തിയതിനെതിരെ കേരള, കാലിക്കറ്റ് സര്‍വ്വകലാശാലകള്‍ക്ക് കീഴിലെ എല്ലാ ക്യാമ്പസുകളിലും നാളെ കെ.എസ്.യു പഠിപ്പ് മുടക്ക് നടത്തും.സര്‍ക്കാരിന്റെ ഇടപെടലില്‍ യൂണിവേഴ്‌സിറ്റിയുടെ ഭാഗത്തുനിന്നും അനുകൂലമായ തീരുമാനം ഉണ്ടായില്ലെങ്കില്‍ ഈ മാസം 23ന് നടക്കുന്ന കേരള യൂണിവേഴ്‌സിറ്റി പരീക്ഷകള്‍ തടയാനാണ് കെഎസ്യു തീരുമാനം .

സര്‍ക്കാരിന്റെ അറിവോടെയാണ് യൂണിവേഴ്‌സിറ്റിയില്‍ കൊള്ള നടക്കുന്നതെന്നും ഉന്നത വിദ്യാഭ്യാസ മന്ത്രി കൂട്ടുനില്‍ക്കുന്നുവെന്നും കെഎസ്യു സംസ്ഥാന പ്രസിഡന്റ് അലോഷ്യസ് സേവിയര്‍ പറഞ്ഞു . യാതൊരു മുന്നൊരുക്കങ്ങളുമില്ലാതെ ആരംഭിച്ച ഡിഗ്രി കോഴ്‌സുകള്‍ വിദ്യാര്‍ത്ഥികളില്‍ വലിയ ആശയ കുഴപ്പം ഉണ്ടാക്കിയെന്നും അലോഷ്യസ് സേവ്യര്‍ വാര്‍ത്താ സമ്മേളനത്തില്‍ വ്യക്തമാക്കി.

നാല് വര്‍ഷ ബിരുദ കോഴ്‌സുകള്‍ നിലവില്‍ വരുമ്പോള്‍ ഫീസ് വര്‍ദ്ധന ഉണ്ടാവില്ലന്ന സര്‍ക്കാര്‍ വാദം നിലനില്‍ക്കെയാണ് സര്‍വ്വകലാശാലകളുടെ ഇരുട്ടടി ഉണ്ടായിരിക്കുന്നത്. മൂന്നും, നാലും ഇരട്ടിയായാണ് ഫീസ് വര്‍ദ്ധന ഉണ്ടായിരിക്കുന്നതെന്നും കെ.എസ്.യു സംസ്ഥാന പ്രസിഡന്റ് കുറ്റപ്പെടുത്തി.യൂണിവേഴ്‌സിറ്റി സര്‍ക്കാര്‍ കൂട്ടുകച്ചവടമാണ്  ഉണ്ടായിരിക്കുന്നത് ,യൂണിവേഴ്‌സിറ്റി ഫിനാന്‍സ് കമ്മിറ്റിയുടെ ഉത്തരവ് വിദ്യാര്‍ത്ഥികളോടുള്ള വെല്ലുവിളിയാണ്.ഉന്നത വിദ്യാഭ്യാസ മന്ത്രി അടിയന്തിരമായി ഇടപെടണമെന്നും കെ.എസ്.യു സംസ്ഥാന പ്രസിഡന്റ്  ആവശ്യപ്പെട്ടു.