തൃശൂര്‍: അറുപതു വര്‍ഷം നീണ്ട മേളപ്പെരുക്കത്തിന്റെ പരിപൂര്‍ണതയില്‍ മേളപ്രമാണി കിഴക്കൂട്ട് അനിയന്‍ മാരാര്‍ക്ക് സപ്തതി. 17-ാം വയസില്‍ പാറമേക്കാവ് വിഭാഗത്തിന്റെ മേളനിരയില്‍ എത്തിയ കിഴക്കൂട്ട് നാരായണന്‍ എന്ന അനിയന്‍ മാരാര്‍ തന്റെ ധന്യജീവിതം മേളപ്പെരുക്കത്തില്‍ ലയിപ്പിക്കുകയായിരുന്നു. സപ്തയില്‍ എത്തുന്ന മുഹൂര്‍ത്തത്തില്‍ തന്നെ മേളകലാരംഗ രംഗപ്രവേശനത്തിന്റെ ഷഷ്ഠിപൂര്‍ത്തിയും ആഘോഷിക്കാനുള്ള അപൂര്‍വ്വ നിയോഗമാണ് അനിയന്‍ മാരാരെ തേടിയെത്തിയിരിക്കുന്നത്. കലോപാസനത്തിനായി ജീവിതം ഉഴിഞ്ഞുവച്ചു എന്നുള്ള പ്രയോഗം ഈ മേളപ്രമാണിക്ക് തീര്‍ത്തും അനുയോജ്യം.
 തിരുവമ്പാടി കൗസ്തുഭം ഓഡിറ്റോറിയത്തില്‍ നടന്ന സപ്തതി ആഘോഷങ്ങളില്‍ ഒരു നാടു മുഴുവന്‍ അദ്ദേഹത്തിന് ആശംസകള്‍ നേരാനെത്തി. ഏറെ ആദരവോടെയും സ്വതസിദ്ധമായ വിനയത്തോടെയും മേളപ്രമാണി ഏവരേയും സ്വീകരിച്ചു. വാദ്യവിദ്യയില്‍ വിസ്മയങ്ങള്‍ തീര്‍ക്കുന്ന ഈ കലോപാസകന് അര്‍ഹതയുടെ അംഗീകാരമാണ് വീരശ്യംഖല. കലാമണ്ഡലം ഗോപിയാശാനാണ് അനിയന്‍ മാരാരെ വീരശ്യംഖല അണിയിച്ചത്.
അനിയന്‍മാരാരുടെ കലാജീവിതത്തെ വിജയസോപാനത്തില്‍ എത്തിച്ച സഹയാത്രികരായ പരിയാരത്ത് ഉണ്ണിമാരാര്‍, പഴോര് ഗോവിന്ദന്‍കുട്ടി നായര്‍, പരിയാരത്ത് നാരായണ മാരാര്‍, പതിയാന ഉണ്ണികൃഷ്ണന്‍ നായര്‍, കല്ലാറ്റ് ബാലകൃഷ്ണ കുറുപ്പ്, വെളപ്പായ ഉണ്ണിനായര്‍, ഈച്ചരത്ത് മാധവന്‍ നായര്‍, രാമാട്ട് നാരായണന്‍ നായര്‍, കേളത്ത് അരവിന്ദാക്ഷമാരാര്‍ എന്നിവരെ ആദരിച്ചു.
ആദരസമ്മേളനം ആവണപറമ്പ് മഹേശ്വരന്‍ നമ്പൂതിരിപ്പാട് ഉദ്ഘാടനം ചെയ്തു. പ്രഫ.ജോര്‍ജ്ജ്.എസ്.പോള്‍ അധ്യക്ഷനായി. കോരമ്പത്ത് ഗോപിനാഥന്‍ ആദരണീയരെ പരിചയപ്പെടുത്തി.തേറമ്പില്‍ രാമകൃഷ്ണന്‍ ഷാള്‍ അണിയിച്ചു. പെരുവനം കുട്ടന്‍മാരാര്‍ നയിച്ച പാണ്ടിമേളത്തിനുശേഷം തിരുവമ്പാടി ക്ഷേത്രഗോപുരത്തില്‍ നിന്നും പഞ്ചവാദ്യത്തിന്റെ അകമ്പടിയോടെ അനിയന്‍ മാരാരെ സദസിലേയ്ക്ക് ആനയിച്ചു.
തുടര്‍ന്ന് നടന്ന വീരശ്യംഖല സമര്‍പ്പണം സഹകരണ വകുപ്പ് മന്ത്രി എ.സി മൊയ്തീന്‍ ഉദ്ഘാടനം ചെയ്തു. മേയര്‍ അജിത ജയരാജന്‍ അധ്യക്ഷയായി. സി.എന്‍ ജയദേവന്‍ എം.പി മുഖ്യപ്രഭാഷണം നടത്തി. എസ്.എന്‍ സ്വാമി, പെരുവനം കുട്ടന്‍മാരാര്‍ പൊന്നാട അണിയിച്ചു. മട്ടന്നൂര്‍ ശങ്കരന്‍കുട്ടി മാരാര്‍ പുഷ്പ കിരീടധാരണവും അന്നമനട പരമേശ്വരമാരാര്‍ ചന്ദനഹാര സമര്‍പ്പണവും നടത്തി. ടി.എ സുന്ദര്‍മേനോന്‍ മംഗളപത്രം സമര്‍പ്പിച്ചു.