വെട്ടത്തൂര്‍: നവോഥാന വര്‍ഷാചരണത്തിന്റെ ഭാഗമായി കേരള ശാസ്ത്ര സാഹിത്യ പരിഷത്ത് നടത്തുന്ന കലാജാഥക്ക് നാളെ വെട്ടത്തൂരില്‍ സ്വീകരണം നല്‍കും. വൈകീട്ട് ആറിന് വെട്ടത്തൂര്‍ ഗ്രാമീണ വായനശാലാ അങ്കണത്തിലാണ് കലാജാഥയെ വരവേല്‍ക്കുക. തുടര്‍ന്ന് എ.എം.യു.പി സ്‌കൂളില്‍ ജാഥാ അംഗങ്ങള്‍ അവതരിപ്പിക്കുന്ന വിവിധ കലാരൂപങ്ങളും എന്‍.കെ മണി വഴിക്കടവിന്റെ ശാസ്ത്ര മാജിക്കും അരങ്ങേറും.
കലാജാഥയുടെ പ്രചാരണാര്‍ഥം ഗ്രാമീണ വായനശാലയുമായി സഹകരിച്ച് വെട്ടത്തൂരില്‍ വിവിധ പരിപാടികളാണ് സംഘടിപ്പിച്ചത്. 250ഓളം സ്ത്രീകള്‍ പങ്കെടുത്ത വീട്ടുമുറ്റ ക്ലാസുകളും സോപ്പ് നിര്‍മാണ പരിശീലനവും പൂര്‍ത്തിയായി. പ്രവര്‍ത്തനങ്ങള്‍ക്ക് പി ജദീന്ദ്ര, പി.പി ഇസ്ഹാഖ്, കെ ചന്ദ്രിക, കെ ജ്യോതി, വി മണികണ്ഠന്‍, കെ വിലാസിനി, ചിന്താന നേതൃത്വം നല്‍കി. ഫാസിസത്തിനെതിരേ വരക്കൂട്ടം, ശാസ്ത്ര പുസ്തക പ്രചാരണം, കലാജാഥാ വിളംബര ഘോഷയാത്ര തുടങ്ങിയ അനുബന്ധ പരിപാടികളും നടന്നു.
ഇന്ന് വൈകീട്ട് ആറിന് വെട്ടത്തൂര്‍ വായനശാലയില്‍ യുവതക്കൂട്ടം സംവാദ സദസ് സംഘടിപ്പിക്കും. വേണു പാലൂര്‍ നേതൃത്വം നല്‍കും. സംസ്ഥാന യുവജനക്ഷേമ ബോര്‍ഡ് ജില്ലാ കോഡിനേറ്റര്‍ കെ.പി നജ്മുദ്ദീന്‍ മോഡറേറ്ററാകും.