ലണ്ടന്‍: ഇംഗ്ലീഷ് സ്‌ട്രൈക്കര്‍ ഹാരി കെയ്ന്‍ വീണ്ടും ഹാട്രിക്ക് ഗോളുകളുമായി കളം വാണപ്പോള്‍ ടോട്ടനം ഹോട്‌സ്പറിനു തകര്‍പ്പന്‍ ജയം. ഇംഗ്ലീഷ് പ്രീമിയര്‍ ലീഗ് പോരാട്ടത്തില്‍ സ്റ്റോക് സിറ്റിയെ 4-0ത്തിനാണ് ടോട്ടനം വീഴ്ത്തിയത്. നേരത്തെ യൂറോപ്പ ലീഗ് പോരാത്തില്‍ നിന്നു പുറത്തായതിന്റെ ക്ഷീണത്തിലായിരുന്ന ടീം പ്രീമിയര്‍ ലീഗില്‍ ശക്തമായ തിരിച്ചുവരവാണു നടത്തിയിരിക്കുന്നത്. ജയത്തോടെ മാഞ്ചസ്റ്റര്‍ സിറ്റിയെ പിന്തള്ളി പോയിന്റ് പട്ടികയില്‍ രണ്ടാം സ്ഥാനത്തേക്കു ഉയരാനും ഒന്നാം സ്ഥാനത്തുള്ള ചെല്‍സിയുമായി പോയിന്റ് വ്യത്യാസം പത്താക്കി കുറക്കാനും ടീമിനായി.
ആദ്യ പകുതിയുടെ 14, 32, 37 മിനുട്ടുകളിലാണ് കെയ്ന്‍ ഹാട്രിക്ക് തികച്ചത്. 45ാം മിനുട്ടില്‍ ഡെലെ അല്ലിയുടെ ഗോളില്‍ ടോട്ടനം നാലു ഗോളുകള്‍ ആദ്യ പകുതിയില്‍ തന്നെ സ്‌കോര്‍ ചെയ്ത് വിജയം ഉറപ്പാക്കി. ക്ലബ് ഫുട്‌ബോള്‍ കരിയറിലെ 100ാം ഗോള്‍ തികക്കാനും ഹാട്രിക്കിലൂടെ കെയ്‌നിനു സാധിച്ചു. ടോട്ടനത്തിനായി ഇതു നാലാം തവണയാണ് കെയ്ന്‍ ഹാട്രിക്ക് സ്വന്തമാക്കുന്നത്.