നിസാര്‍ കലയത്ത്#

ജിദ്ദ: വിദേശ തൊഴിലാളികളുടെ റിക്രൂട്ട്‌മെന്റ്, തൊഴില്‍ മാറ്റം എന്നിവയുമായി ബന്ധപ്പെട്ട നിയമ ഭേതഗതിക്ക് തൊഴില്‍ മന്ത്രാലയം അംഗീകാരം നല്‍കി. തൊഴിലാളികളുടെ അവകാശങ്ങള്‍ സംരക്ഷിക്കുന്നതും സ്വദേശിവല്‍ക്കരണം ശക്തിപ്പെടുത്തുന്നതുമാണ് പുതിയ ഭേതഗതി. ഇതുപ്രകാരം നിയമലംഘനം നടത്തുന്ന സ്ഥാപനങ്ങള്‍ക്ക് പുതിയ വിസ അനുവദിക്കില്ല.

വിദേശ തൊഴിലാളികളുടെ റിക്രൂട്ട്‌മെന്റ്, സ്‌പോണ്‍സര്‍ഷിപ്പ് മാറ്റം, പ്രൊഫഷന്‍ മാറ്റം തുടങ്ങിയ നിയമങ്ങളിലാണ് സഊദി തൊഴില്‍ മന്ത്രാലയം ഭേതഗതി വരുത്തിയത്. ഇത് സഊദിവല്‍ക്കരണ പദ്ധതിയെ പ്രതികൂലമായി ബാധിക്കുമെങ്കില്‍ വിദേശികളെ റിക്രൂട്ട് ചെയ്യാന്‍ അനുവദിക്കില്ല.
18നും 60നും ഇടയില്‍ പ്രായമുള്ള വിദേശികള്‍ക്ക് മാത്രമേ തൊഴില്‍ വിസ അനുവദിക്കുകയുള്ളു. എന്നാല്‍ പ്രത്യേക സാഹചര്യങ്ങളില്‍ ഡോക്ടര്‍മാര്‍ ഉള്‍പ്പെടെയുള്ള ചില പ്രൊഫഷനുകളില്‍ ഇളവ് അനുവദിക്കും.
തൊഴിലാളികള്‍ക്ക് കൃത്യസമയത്ത് ശമ്പളം നല്‍കാതിരിക്കുക, വിദേശികളെ മറ്റു സ്‌പോണ്‍സര്‍മാര്‍ക്ക് കീഴില്‍ ജോലി ചെയ്യാന്‍ അനുവദിക്കുക, ബിനാമി ബിസിനസിന് കൂട്ടുനില്‍ക്കുക, സ്വദേശിവല്‍ക്കരണം നടപ്പിലാക്കുന്നതില്‍ വീഴ്ചവരുത്തുക തുടങ്ങിയവ കണ്ടെത്തിയാല്‍ സ്ഥാപനങ്ങള്‍ക്ക് വിസ അനുവദിക്കില്ല.

തെറ്റായ വിവരങ്ങള്‍ നല്‍കി തൊഴില്‍ മന്ത്രാലയത്തെ തെറ്റിദ്ധരിപ്പിച്ചാലും തൊഴിലാളികളുടെ താമസരേഖ പുതുക്കാതിരുന്നാലും നടപടിയുണ്ടാകും. തൊഴില്‍ നിയമലംഘനം നടത്തുന്ന സ്ഥാപനങ്ങളിലേക്ക് വിദേശ തൊഴിലാളികളുടെ സ്‌പോണ്‍സര്‍ഷിപ്പ് മാറാന്‍ അനുവദിക്കില്ല. ഇത്തരം സ്ഥാപനങ്ങളില്‍ നിന്ന് അവരുടെ അനുമതിയില്ലാതെ തന്നെ വിദേശികള്‍ക്ക് സ്‌പോണ്‍സര്‍ഷിപ്പ് മാറാം. ഇഖാമയിലെ പ്രൊഫഷന്‍ മാറ്റണമെങ്കില്‍ പുതിയ പ്രൊഫഷനുമായി ബന്ധപ്പെട്ട രേഖകള്‍ അതത് രാജ്യങ്ങളിലെ സഊദി എംബസി അറ്റസ്റ്റ് ചെയ്യണമെന്നും പുതിയ നിയമം വ്യവസ്ഥ ചെയ്യുന്നു.
അതേസമയം വിദേശ തൊഴിലാളികളുടെ സ്‌പോണ്‍സര്‍ഷിപ്പ് മാറുന്നതിനുള്ള പുതിയ പരിഷ്‌ക്കരണങ്ങള്‍ ആശ്വാസം നല്‍കുന്നവയാണ്. പുതിയ നിയമ പ്രകാരം ഒരു സ്‌പോണ്‍സറുടെ കീഴില്‍ ജോലിചെയ്യുന്ന വിദേശിക്ക് മറ്റൊരു സ്‌പോണ്‍സറുടെ കീഴിലേക്ക് മാറാന്‍ സമയ പരിധിയില്ല.