നിലമ്പൂര്‍: വിദ്യാര്‍ഥികള്‍ വ്യാപകമായ തോതില്‍ കഞ്ചാവ് ഉള്‍പ്പെടെ ലഹരി ഉപയോഗിക്കുന്നതായി കണ്ടെത്തിയതിനെ തുടര്‍ന്നു നിലമ്പൂര്‍ റെയ്ഞ്ച് എക്‌സൈസ് സംഘം നടത്തിയ പരിശോധനയില്‍ കഞ്ചാവുമായി മൂന്നു പേര്‍ അറസ്റ്റിലായി. മൂത്തേടം പനമ്പറ്റ മൂസ (50), മൂത്തേടം പാറക്കത്തൊടി സുലൈമാന്‍ (49), വയനാട് വടുവഞ്ചാല്‍ സ്വദേശി ശരത് (21) എന്നിവരെയാണ് വഴിക്കടവ്, എടക്കര, മൂത്തേടം എന്നിവിടങ്ങളില്‍നിന്ന് അറസ്റ്റ് ചെയ്തത്.
മൂസയുടേയും സുലൈമാന്റെയും കൈയില്‍നിന്നു 50 ഗ്രാം വീതം കഞ്ചാവും ശരത്തിന്റെ കൈയില്‍നിന്നു 500 ഗ്രാം കഞ്ചാവും ബൈക്കുമാണ് പിടിച്ചെടുത്തത്. വയനാട്ടില്‍നിന്നു കിണര്‍ ജോലിക്കായി എത്തിയ ശരത് എടക്കര മുണ്ടയില്‍ വീട് വാടകയ്‌ക്കെടുത്ത് താമസിച്ചുവരികയാണ്. ഇയാള്‍ പിടിക്കപ്പെട്ട ശേഷവും ഇയാളുടെ ഫോണിലേക്ക് കഞ്ചാവ് ആവശ്യപ്പെട്ടുകൊണ്ടുള്ള വിളികള്‍ വിദ്യാര്‍ഥികള്‍ അടക്കമുള്ളവരില്‍നിന്നു വരുന്നുണ്ട്.
നിലമ്പൂര്‍ റെയ്ഞ്ച് എക്‌സൈസ് അസി.ഇന്‍സ്‌പെക്ടര്‍ എന്‍. അശോകന്‍, പ്രവന്റീവ് ഓഫിസര്‍ ജോര്‍ജ് തോമസ്, സി.ഇ.ഒമാരായ ജയാനന്ദന്‍, സുഭാഷ്, റഷീദ്, ഷീന, ഡ്രൈവര്‍ പ്രദീപ് എന്നിവര്‍ പരിശോധനാ സംഘത്തിലുണ്ടായിരുന്നു. പ്രതികളെ നിലമ്പൂര്‍ കോടതിയില്‍ ഹാജരാക്കി..