സിഡ്‌നി: ആസ്‌ത്രേലിയന്‍ ഓപണ്‍ ബാഡ്മിന്റണ്‍ ടൂര്‍ണമെന്റില്‍ ഇന്ത്യയുടെ സൈന നെഹ്‌വാളിന് കിരീടം. ചൈനയുടെ സുന്‍ യുവിനെയാണ് സൈന ഫൈനലില്‍ വീഴ്ത്തിയത്. സ്‌കോര്‍ 11-21, 21-14, 21-19. കളത്തിലിറങ്ങും മുന്‍പേ സുന്‍ യുവിനെതിരേ വ്യക്തമായ ആധിപത്യം സൈനയ്ക്കുണ്ടായിരുന്നു.

നേരത്തെ ഇരുവരും ഏറ്റുമുട്ടിയ അവസാന അഞ്ചു മത്സരങ്ങളില്‍ ജയം സൈനയ്‌ക്കൊപ്പമായിരുന്നു. ക്വാര്‍ട്ടറിലും സെമിയിലും ലോക ജേതാക്കളെ പരാജയപ്പെടുത്തിയെത്തിയ സൈന ചൈനീസ് താരത്തെ അനായാസം പരാജയപ്പെടുത്തുമെന്നായിരുന്നു കരുതിയിരുന്നത്. എന്നാല്‍ മികച്ച പോരാട്ടമാണ് സുന്‍ യു കാഴ്ച്ചവച്ചത്. ആദ്യ സെറ്റില്‍ സൈനയെ ഞെട്ടിക്കാനും താരത്തിന് സാധിച്ചു. നിരന്തരം പിഴവ് വരുത്തിയ സൈനയ്ക്ക് ചൈനീസ് താരത്തിന് മുന്നില്‍ ആദ്യ സെറ്റ് നഷ്ടമായി. എന്നാല്‍ രണ്ടാം മത്സരത്തില്‍ മികവോടെ പൊരുതിയ സൈന സെറ്റ് സ്വന്തമാക്കി. അവസാന സെറ്റില്‍ മികവ് തുടര്‍ന്ന സൈന മത്സരം സ്വന്തമാക്കുകയായിരുന്നു.