ശ്രീനഗര്‍: ജമ്മു കശ്മിരില്‍ രൂക്ഷമായ ഏറ്റുമുട്ടലിനൊടുവില്‍ രണ്ട് ഭീകരരെ സൈന്യം വധിച്ചു. ഹിസ്ബുല്‍ മുജാഹിദീന്‍ പ്രവര്‍ത്തകരും സൈന്യം കൊടുംഭീകരരുടെ പട്ടികയില്‍ പരാമര്‍ശിക്കുകയും ചെയ്ത സീനത്തുല്‍ ഇസ്‌ലാം, ഷക്കീല്‍ ധര്‍ എന്നിവരെയാണ് കൊലപ്പെടുത്തിയതെന്ന് സൈന്യം അറിയിച്ചു.
2015 മുതല്‍ കശ്മിരില്‍ സജീവമായി ഭീകരപ്രവര്‍ത്തനം നടത്തിവന്ന ഇരുവരുമുള്‍പ്പെട്ട നിരവധി ആക്രമണങ്ങളാണ് താഴ്‌വരയിലുണ്ടായത്. ദക്ഷിണ കശ്മിരിലെ കുല്‍ഗാം ജില്ലയിലെ യാരിപ്പോറക്കടുത്ത കട്‌പോറയിലായിരുന്നു ഏറ്റുമുട്ടലുണ്ടായത്. ഇവിടെ ഭീകരര്‍ ഒളിച്ചുതാമസിക്കുന്നുണ്ടെന്ന വിവരത്തെ തുടര്‍ന്ന് അന്വേഷണം നടത്തുന്നതിനിടയിലാണ് ഇവര്‍ സൈന്യത്തിനുനേരെ ആക്രമണം നടത്തിയത്. സൈന്യം നടത്തിയ ശക്തമായ തിരിച്ചടിയിലാണ് ഇരുവരും കൊല്ലപ്പെട്ടത്.അതിനിടെ, അതിര്‍ത്തിയില്‍ പാക് സൈന്യം നടത്തിയ ആക്രമണത്തില്‍ ഒരു സൈനികന് പരുക്കേറ്റു. രജൗറി ജില്ലയില്‍ അന്താരാഷ്ട്ര അതിര്‍ത്തിയോട് ചേര്‍ന്നായിരുന്നു ആക്രമണം. ഇദ്ദേഹത്തെ ഉടന്‍ ആശുപത്രിയില്‍ പ്രവേശിപ്പിച്ചു. കെറി സെക്ടറില്‍ പ്രകോപനമില്ലാതെ പാക് സൈന്യം ആക്രമണം നടത്തുകയായിരുന്നു.