ഷില്ലോങ്: ഐ ലീഗിലെ കുട്ടി സംഘമായ ഇന്ത്യന്‍ ആരോസിന് തകര്‍പ്പന്‍ ജയം. ഷില്ലോങ് ലജോങിന്റെ ഹോം ഗ്രൗണ്ടില്‍ നടന്ന പോരാട്ടത്തില്‍ എതിരില്ലാത്ത മൂന്ന് ഗോളുകള്‍ക്കാണ് ആരോസ് ജയം കുറിച്ചത്. 18 ാം മിനുട്ടില്‍ വിക്രം പ്രതാപ് സിങാണ് ആരോസിന്റെ ആദ്യ ഗോള്‍ നേടിയത്. 32 ാം മിനുട്ടില്‍ ലാലെങ്മാവിയ ആരോസിന്റെ രണ്ടാം ഗോളും സ്വന്തമാക്കി. ആദ്യ പകുതിയുടെ അവസാന മിനുട്ടില്‍ നിതായിങ്ബാ മീതായ് മൂന്നാം ഗോളും നേടി ആരോസിന്റെ ഗോള്‍ പട്ടിക പൂര്‍ത്തിയാക്കി. രണ്ടാം പകുതിയില്‍ ലജോങിനുമേല്‍ ആരോസ് സര്‍വാധിപത്യം നേടി. നിരവധി ഗോളവസരങ്ങള്‍ ആരോസിന് ലഭിച്ചെങ്കിലും ഫിനിഷിങിലെ പോരായ്മ വില്ലനായി. സീസണില്‍ ഏറ്റവും മോശം ഫോമിലുള്ള രണ്ട് ടീമായിരുന്നു ഇന്ത്യന്‍ ആരോസും ഷില്ലോങ് ലജോങും. എന്നാല്‍ ലജോങിനുമേല്‍ ഉജ്വല വിജയം നേടിയതോടെ ആരോസ് 13 പോയിന്റുമായി ലീഗില്‍ എട്ടാം സ്ഥാനത്തേക്ക് ഉയര്‍ന്നു. ഇതോടെ സീസണിലെ നാലാമത്തെ ജയം സ്വന്തമാക്കാനും ആരോസിനായി. 12 മത്സരം പൂര്‍ത്തിയാക്കിയ ലജോങിന് ഒരു വിജയം മാത്രമാണുള്ളത്. പട്ടികയില്‍ അവസാന സ്ഥാനത്തുള്ള ഷില്ലോങിന് നാല് പോയിന്റ് മാത്രമാണുള്ളത്. ആരോസ് ജയിച്ചതോടെ 12 മത്സരത്തില്‍നിന്ന് 10 പോയിന്റുള്ള ഗോകുലം കേരള എഫ്.സി ഒന്‍പതാം സ്ഥാനത്തേക്ക് പിന്തള്ളപ്പെട്ടു. ഇന്ന് രാത്രി 7.30ന് ചെന്നൈ സിറ്റി ഈസ്റ്റ് ബംഗാളിനെ നേരിടും. 24 പോയിന്റുമായി ഒന്നാം സ്ഥാനത്ത് തുടരുന്ന ചെന്നൈ തികഞ്ഞ ആത്മവിശ്വാസത്തിലാണ്.