എരമല്ലൂര്‍: ദേശീയപാതയില്‍ എരമല്ലൂര്‍ കവലയില്‍ തകരാറിലായ സിഗ്നല്‍ലൈറ്റ് പുനസ്ഥാപിക്കാത്തതില്‍ പ്രതിഷേധിച്ച് സിഗ്നല്‍ലൈറ്റിന്റെ തൂണിന് ചുവട്ടില്‍ റീത്ത് വച്ച് പ്രതിഷേധിച്ചു. ലാറ്റിന്‍ കാത്തലിക്ക് അസോസിയേഷന്‍ എരമല്ലൂര്‍ യൂണിറ്റിന്റെ നേതൃത്വത്തിലാണ് പ്രതിഷേധം നടത്തിയത്. സിഗ്നല്‍ലൈറ്റ് തകരാറിലായിട്ട് വര്‍ഷങ്ങളായി. നിരവധി പരാതികളയച്ചിട്ടും പരിഹാരമില്ലാത്തതിനാലാണ് പുതിയ സമരമാര്‍ഗം സ്വീകരിച്ചതെന്ന് പ്രവര്‍ത്തകര്‍ പറഞ്ഞു.
കഴിഞ്ഞ ഒരു വര്‍ഷത്തിനുള്ളില്‍ പതിനേഴില്‍പ്പരം അപകടങ്ങളിലായി എട്ടു പേര്‍ ഈ ജഗ്ഷനില്‍ മരിച്ചിരുന്നു. കെല്‍ട്രോണ്‍ കമ്പനിയുടെ നിരുത്തരവാദപരമായ കാരണങ്ങളാലാണ് സിഗ്നല്‍ ലൈറ്റുകള്‍ നശിച്ചുകിടക്കുന്നതെന്ന് സമരം ഉദ്ഘാടനം ചെയ്തുകൊണ്ട് ഫാ ജോസി കണ്ടനാട്ടുതറ പറഞ്ഞു. ഫാ ആന്റണി കുഴിവേലി, ടി.എ ഡാല്‍ഫിന്‍, ജോളി പാവേലി, ജോര്‍ജ് നിക്‌സണ്‍ എന്നിവര്‍ പ്രസംഗിച്ചു.