സിഡ്‌നി: ഇടവേളയ്ക്ക് ശേഷം ആസ്‌ത്രേലിയന്‍ ദേശീയ ടീമില്‍ മടങ്ങിയെത്തി വെടിക്കെട്ട് ബാറ്റ്‌സ്മാന്‍ ഗ്ലെന്‍ മാക്‌സ്‌വെല്‍. ദക്ഷിണാഫ്രിക്കയ്‌ക്കെതിരായ ഏകദിന, ടി20 ടീമിലാണ് താരം തിരികെയെത്തിയത്. കഴിഞ്ഞ വര്‍ഷം മാനസിക പ്രശ്‌നങ്ങളെത്തുടര്‍ന്ന് മാസങ്ങളായി ടീമില്‍നിന്നും അവധിയെടുത്തതായിരുന്നു. ഇതിനുശേഷം ക്രിക്കറ്റിലേക്ക് മടങ്ങിയെത്തിയെങ്കിലും ദേശീയ ടീമില്‍ എത്തുന്നത് ഇതാദ്യമായാണ്. ബിഗ് ബാഷ് ലീഗില്‍ മെല്‍ബണ്‍ സ്റ്റാര്‍സിനുവേണ്ടി പുറത്തെടുത്ത മികച്ച പ്രകടനമാണ് താരത്തെ വീണ്ടും ടീമില്‍ കൊണ്ടെത്തിച്ചത്. ലീഗില്‍ 389 റണ്‍സും എട്ടുവിക്കറ്റുമാണ് സമ്പാദ്യം. ഇന്ത്യയില്‍ പര്യടനം നടത്തിയ ടീമില്‍നിന്നും ആഷ്ടന്‍ ടര്‍ണറെ ഒഴിവാക്കിയാണ് മാക്‌സ്‌വെല്ലിന് ഇടം നല്‍കിയത്. മാത്യു വെയ്ഡ്, മിച്ചല്‍ സ്റ്റാര്‍ക്് എന്നിവരും ടീമിലിടം നേടി. അടുത്തമാസം നടക്കുന്ന പരമ്പരയില്‍ ആരോണ്‍ ഫിഞ്ചാണ് ഏകദിന, ടി20 ടീമുകളുടെ ക്യാപ്റ്റന്‍.