മനാമ: ബഹ്‌റൈന്‍ ചീഫ് ജസ്റ്റിസ് ശൈഖ് ഹമദ് ബിന്‍ സാമി അല്‍ ഫാളില്‍ അദ്ദൗസരിയുമായി ദാറുല്‍ഹുദാ ഇസ്‌ലാമിക് സര്‍വകലാശാലാ വൈസ് ചാന്‍സലര്‍ ഡോ. ബഹാഉദ്ദീന്‍ മുഹമ്മദ് നദ്‌വി കൂടിക്കാഴ്ച നടത്തി. രണ്ട് ദിവസത്തെ ഹൃസ്വ സന്ദര്‍ശനത്തിനായി ബഹ്‌റൈനിലെത്തിയതായിരുന്നു അദ്ദേഹം.
സമസ്ത കേരള ജംഇയ്യത്തുല്‍ ഉലമായുടെ നേതാക്കളുമായി അടുത്ത ബന്ധമുള്ള ചീഫ് ജസ്റ്റിസ് കഴിഞ്ഞ വര്‍ഷം നടന്ന സമസ്തയുടെ 90ാം വാര്‍ഷിക സമ്മേളനത്തിലെ മുഖ്യാതിഥി കൂടിയായിരുന്നു. സമസ്തയുടെ വിദ്യാഭ്യാസ സാമൂഹിക പ്രവര്‍ത്തനങ്ങള്‍ അതുല്യമാണെന്നും സാമൂഹിക മുന്നേറ്റ മേഖലയിലെ സമസ്തയുടെ പ്രവര്‍ത്തനങ്ങള്‍ ഏറെ ആശ്ചര്യപ്പെടുത്തിയെന്നും അഭിപ്രായപ്പെട്ട അദ്ദേഹം ഡിസംബറില്‍ നടക്കുന്ന ദാറുല്‍ഹുദായുടെ ബിരുദദാന സമ്മേളനത്തില്‍ പങ്കെടുക്കുമെന്നും അറിയിച്ചു. ബഹ്‌റൈന്‍ വിദ്യാഭ്യാസ വകുപ്പ് ഡയറക്ടര്‍ ഡോ. ഫവാദും കൂടിക്കാഴ്ചയില്‍ പങ്കെടുത്തു. ബഹ്‌റൈന്‍ സമസ്ത കേരള സുന്നി ജമാഅത്ത് പ്രസിഡന്റ് സയ്യിദ് ഫഖ്‌റുദ്ദീന്‍ തങ്ങള്‍, ട്രഷറര്‍ വി.കെ.കെ കുഞ്ഞിമുഹമ്മദ് എന്നിവരും ഡോ. നദ്‌വിയോടൊപ്പമുണ്ടായിരുന്നു.