മനാമ: ബഹ്‌റൈന്‍ കേരളീയ സമാജം ഏര്‍പ്പെടുത്തിയ സാഹിത്യപുരസ്‌കാരം എഴുത്തുകാരന്‍ സക്കറിയക്ക് സമ്മാനിച്ചു. ബഹ്‌റൈനിലെ സമാജം ഡയമണ്ട് ജൂബിലി ഹാളില്‍നടന്ന ചടങ്ങില്‍ പ്രസിഡന്റ് പി.വി രാധാകൃഷ്ണപിള്ളയാണ് അവാര്‍ഡ് സമ്മാനിച്ചത്. കലാസാഹിത്യ രംഗത്തും മലയാള ഭാഷക്കും നല്‍കിയ സമഗ്രസംഭാവനകള്‍ മാനിച്ചാണ് സമാജത്തിന്റെ പുരസ്‌കാരം.
എഴുത്തുകാരന് തന്റെ സമൂഹത്തോടും വായനക്കാരോടും ഉത്തരവാദിത്തമുണ്ടായിരിക്കണമെന്ന് മറുപടി പ്രസംഗം നിര്‍വഹിച്ച് സക്കറിയ പറഞ്ഞു. ചടങ്ങില്‍ പ്രസിഡന്റ് പി.വി രാധാകൃഷ്ണപിള്ള അധ്യക്ഷനായിരുന്നു. സെക്രട്ടറി എന്‍.കെ വീരമണി ആശംസ നേര്‍ന്നു. പരിപാടിയുടെ ഭാഗമായി ഭരത്ശ്രീ രാധാകൃഷ്ണന്‍ സംവിധാനം ചെയ്ത 'അമ്മമലയാളം' കാവ്യശില്‍പം അരങ്ങേറി. ജയകൃഷ്ണന്‍, ബഹ്‌റൈന്‍ കേരളീയ സമാജം സാഹിത്യവിഭാഗം സെക്രട്ടറി സുധി പുത്തന്‍വേലിക്കര, ഫ്രാന്‍സിസ് കൈതാരത്ത് സംസാരിച്ചു.