പരപ്പനങ്ങാടി: ചരക്കിറക്കി പോവുകയായിരുന്ന ഇന്‍സുലേറ്റ് ലോറി വൈദ്യുതി പോസ്റ്റിലിടിച്ച് വൈദ്യുതിക്കാല്‍ തകര്‍ന്ന് വീണ് മണിക്കൂറുകളോളം വൈദ്യുതി നിലച്ചു. ഇന്നലെ രാവിലെ ആറരയോടെയാണ് സംഭവം. കോഴിക്കോട് നിന്ന് ചരക്കിറക്കി കൊച്ചിയിലേക്ക് പോവുകയായിരുന്ന ലോറി ചിറമംഗലം എ.എം.എല്‍.പി സ്‌കൂളിന് സമീപത്തെ പോസ്റ്റിലിടിക്കുകയായിരുന്നു.
ഡ്രൈവര്‍ ഉറങ്ങിയതാണ് അപകടത്തിന് കാരണം. ഇടിയുടെ ആഘാതത്തില്‍ ഇരുമ്പിന്റെ വൈദ്യുതിത്തൂണും വലിച്ചിഴച്ചു ലോറി നൂറു മീറ്റര്‍ അകലെ എത്തിയ ശേഷം നിര്‍ത്തുകയായിരുന്നു.
ഇടിയില്‍ ലോറിയുടെ മുന്‍ഭാഗം ഭാഗികമായി തകര്‍ന്നിട്ടുണ്ട്. അപകടത്തില്‍ ആര്‍ക്കും പരുക്കില്ല.
ഇത് കാരണം ചിറമംഗലം ഭാഗത്ത് ആറു മണിക്കൂറാണ് വൈദ്യുതി ബന്ധം നിലച്ചത്. മണിക്കൂറുകളുടെ പരിശ്രമത്തിനൊടുവില്‍ ഒരു മണിയോടെ കെ.എസ്.ഇ.ബി തൊഴിലാളികളെത്തി വൈദ്യുതി ബന്ധം പുനസ്ഥാപിച്ചു.