തൊടുപുഴ:  സംസ്ഥാന സിവില്‍ സര്‍വീസ് രൂപീകരണവും ഭരണ പരിഷ്‌കാര നടപടികളും ത്വരിതപ്പെടുത്തണമെന്ന് കെ.ജി.ഒ.എ ജില്ലാ സമ്മേളനം ആവശ്യപ്പെട്ടു. കേരളത്തിന്റെ ഭരണ സംവിധാനം മെച്ചപ്പെടുത്തുന്നതിനുള്ള ഗൗരവമായ ശ്രമങ്ങളാണ് 57ലും 65ലും 97ലും രൂപീകരിക്കപ്പെട്ട ഭരണപരിഷ്‌കരണ കമീഷനുകള്‍ നടത്തിയത്.
ഭരണ സംവിധാനത്തില്‍ വരുത്തേണ്ട കാതലായ മാറ്റങ്ങളെക്കുറിച്ച് നിരവധി നിര്‍ദ്ദേശങ്ങള്‍ ഈ കമ്മിഷനുകള്‍ നല്‍കുകയും ചിലതൊക്കെ നടപ്പാക്കുകയും ചെയ്തിട്ടുണ്ട്. സാധാരണ ജനങ്ങള്‍ക്ക് പ്രാപ്യമാകുന്ന രീതിയില്‍ ഭരണസംവിധാനം ഇനിയും മാറേണ്ടതുണ്ട്. ഭരണനയങ്ങള്‍ കാര്യക്ഷമമായി നടപ്പാക്കാനുതകുന്നതരത്തില്‍ സിവില്‍ സര്‍വീസിനെ സജ്ജമാക്കാനുള്ള ബഹുമുഖ പ്രവര്‍ത്തനങ്ങള്‍ സര്‍ക്കാര്‍ ഏറ്റെടുക്കണം. സ്‌റ്റേറ്റ് സിവില്‍ സര്‍വീസിലേക്കുള്ള തെരഞ്ഞെടുപ്പും നിയമനവും കൃത്യമായ മാനദണ്ഡങ്ങളനുസരിച്ച് സുതാര്യമായി നടത്തുകയും വേണമെന്ന് സമ്മേളനം ആവശ്യപ്പെട്ടു.
സര്‍വീസ് സംഘടനകളുമായി നടത്തിയ ചര്‍ച്ചയില്‍ പൊതുവെ എല്ലാ വിഭാഗങ്ങള്‍ക്കും തൃപ്തികരമായ നിലപാടാണ് സര്‍ക്കാര്‍ സ്വീകരിച്ചിട്ടുള്ളത്. ഇത് സംബന്ധിച്ച തുടര്‍ നടപടികളും ഇതര ഭരണപരിഷ്‌കരണ നടപടികളും ത്വരിതപ്പെടുത്തണമെന്നും സമ്മേളനം ആവശ്യപ്പെട്ടു.
ചെറുതോണി പൊലിസ് അസോസിയേഷന്‍ ഹാളില്‍ നടന്ന പ്രതിനിധി സമ്മേളനം അഡ്വ. ജോയ്‌സ് ജോര്‍ജ് എം.പി ഉദ്ഘാടനം ചെയ്തു. സി.ഐ.ടി.യു ജില്ലാ സെക്രട്ടറി കെ എസ് മോഹനന്‍, എഫ്എസ്ഇടിഒ ജില്ലാ സെക്രട്ടറി എസ് സുനില്‍കുമാര്‍, കേന്ദ്ര ജീവനക്കാരുടെ സംഘടനകളുടെ കേണ്‍ഫെഡറേഷന്‍ നേതാവ് ടി ഡി ജോസ് എന്നിവര്‍ സംസാരിച്ചു. സംസ്ഥാന സെക്രട്ടറിയറ്റംഗം ടി എം മിനി സംഘടനാ റിപ്പോര്‍ട്ട് അവതരിപ്പിച്ചു.
സമ്മേളനത്തിന്റെ ഭാഗമായി 'നവകേരള  പരിപാടിയും ഗസ്റ്റഡ് ജീവനക്കാരും' എന്ന വിഷയത്തില്‍ എറണാകുളം ജില്ലാ ഡെപ്യൂട്ടി പ്ലാനിങ് ഓഫീസര്‍ സി എന്‍ സുഭാഷ് പ്രഭാഷണം നടത്തി. കര്‍ഷകസംഘം ജില്ലാ  പ്രസിഡന്റ് സി വി വര്‍ഗീസ് ഉദ്ഘാടനം ചെയ്തു. അസോസിയേഷന്‍ പ്രസിഡന്റ് ജയന്‍ പി വിജയന്‍ അധ്യക്ഷനായി.