തിരുവനന്തപുരം: കളിയിക്കാവിളയില്‍ എ.എസ്.ഐയെ കൊലപ്പെടുത്തിയ കേസില്‍ ഗൂഢാലോചനയില്‍ പങ്കുള്ള മുഖ്യസഹായി പിടിയില്‍. തിരുവനന്തപുരം പാളയത്ത് വച്ചാണ് സെയ്ദ് അലി എന്ന് പ്രതിയെ ക്യൂബ്രാഞ്ച്് പിടികൂടിയത്. കേരളത്തില്‍ പ്രതികള്‍ക്കാവശ്യമായ സഹായങ്ങള്‍ ചെയ്തത് സെയ്ദ് അലിയാണെന്നാണ് പൊലിസിന്റെ നിഗമനം.

കൊലപാതകത്തിന് പിന്നാലെ ഒളിവില്‍ പോയ ഇയാള്‍ തിരുവനന്തപുരം നഗരത്തില്‍ തന്നെയുണ്ടെന്ന രഹസ്യവിവരത്തെ തുടര്‍ന്ന് നടത്തിയ പരിശോധനയിലാണ് പിടിയിലായത്. മുഖ്യപ്രതികളായ തൗഫീഖുമായും മുഹമ്മദ് ഷെമീമുമായും അടുത്ത ബന്ധമുള്ള സെയ്ദ് അലിക്ക് ഗൂഢാലോചനയില്‍ നേരിട്ട് പങ്കുണ്ടെന്ന് പൊലിസ് പറഞ്ഞു. കൃത്യം നടത്തുന്നതിന് രണ്ട് ദിവസം മുന്‍പ് തന്നെ നെയ്യാറ്റിന്‍കരയിലെത്തിയ തൗഫീഖിനും ഷെമീമിനും എല്ലാ സഹായങ്ങളും ചെയ്ത്‌നല്‍കിയത് സെയ്ദ് അലിയായിരുന്നു. ഇയാള്‍ ഏര്‍പ്പാടാക്കിയ വാടകവീട്ടില്‍ വച്ചാണ് കൊലപാതകം ആസൂത്രണം ചെയ്തതെന്നും പൊലിസ് സംശയിക്കുന്നുണ്ട്. കേസ് എന്‍.ഐ.എ ഏറ്റെടുത്തതിനാല്‍ സെയ്ദ് അലിയെയും എന്‍.ഐ.എക്ക് കൈമാറും.