കോഴിക്കോട്: കൊച്ചി മെട്രോയുടെ ഉദ്ഘാടനത്തില്‍ പ്രധാനമന്ത്രിക്കൊപ്പം കയറിയ കുമ്മനം രാജശേഖരന്റെ അനുഭവം ആവര്‍ത്തിക്കാതിരിക്കാനാണ് കൊല്ലം ബൈപാസ് ഉദ്ഘാടന ചടങ്ങില്‍ പങ്കെടുക്കാത്തതെന്ന് ബി.ജെ.പി സംസ്ഥാന അധ്യക്ഷന്‍ പി. എസ് ശ്രീധരന്‍പിള്ള.
ഭരണകൂട ഭീകരതയ്ക്കും പൊലിസ് രാജിനുമെതിരേ ശ്രീധരന്‍ പിള്ള കോഴിക്കോട് നടത്തുന്ന ഏകദിന സത്യഗ്രഹ വേദിയിലായിരുന്നു ഇങ്ങനെ പറഞ്ഞത്.
ബൈപാസ് ഉദ്ഘാടന ചടങ്ങില്‍ വിട്ടുനിന്നത് മനഃപൂര്‍വമാണ്. നിലവില്‍ താന്‍ ഔദ്യോഗികമായി ഒരു പദവിയും അലങ്കരിക്കുന്നില്ല. ഇത്തരം ഒരു സംഭവം ട്രോള്‍ വാര്‍ത്തയാകാതിരിക്കാനാണ് ഉദ്ഘാടന ചടങ്ങില്‍ നിന്ന് വിട്ടുനിന്നതെന്നും ശ്രീധരന്‍ പിള്ള വ്യക്തമാക്കി. പ്രധാനമന്ത്രി നേരിട്ടെത്തി കൊല്ലം ബൈപാസ് ഉദ്ഘാടനം ചെയ്തിട്ടും ശ്രീധരന്‍പിള്ളയെ ചടങ്ങില്‍ കാണാതിരുന്നത് ചര്‍ച്ചയ്ക്ക് വഴിയൊരുക്കിയിരുന്നു.
തുടര്‍ന്നാണ് വിശദീകരണവുമായി അദ്ദേഹം രംഗത്തെത്തിയത്. ചടങ്ങില്‍ മുഖ്യമന്ത്രി പിണറായി വിജയന്‍ സംസാരിച്ചപ്പോള്‍ കൂവല്‍ ഉണ്ടായതിനെയും ബി.ജെ.പി അധ്യക്ഷന്‍ വിമര്‍ശിച്ചു. സംഭവത്തെ ജനാധിപത്യ സംവിധാനത്തില്‍ ന്യായീകരിക്കാനാവില്ല. എത്രമാത്രം എതിര്‍പ്പുണ്ടെങ്കിലും കൂകിയത് ന്യായീകരിക്കാനാവില്ലെന്നും ശ്രീധരന്‍ പിള്ള പറഞ്ഞു.
പൊതുവേദിയില്‍ കൂകി വിളിച്ച ആരെയും ബി.ജെ.പി ന്യായീകരിക്കില്ല. എതിര്‍ക്കുന്നവരെ മാനിക്കലാണ് ജനാധിപത്യമെന്നും സി.പി.എം നേതാക്കള്‍ പ്രതീക്ഷിക്കുന്നത് പോലെയല്ല ബി.ജെ.പിയുടെ സമരമെന്നും ശ്രീധരന്‍ പിള്ള കൂട്ടിച്ചേര്‍ത്തു. അതേസമയം സെക്രട്ടേറിയറ്റ് സമരത്തിന്റെ രൂപം മാറ്റുമെന്ന് ശ്രീധരന്‍ പിള്ള സൂചന നല്‍കി.
പ്രഖ്യാപിതമായ ആവശ്യം ലക്ഷ്യം കാണുന്നതുവരെ സമരരംഗത്ത് തുടരും. പക്ഷേ, സമരത്തിന്റെ രൂപവും ഭാവവും മാറിയേക്കാമെന്നും അദ്ദേഹം സൂചിപ്പിച്ചു.