നിലമ്പൂര്‍: നഗരസഭാ കുടിവെള്ള പദ്ധതി നടപ്പിലാക്കാന്‍ പൊളിച്ച റോഡ് നന്നാക്കാത്തതില്‍ നാട്ടുകാരുടെ പ്രതിഷേധം. ജലസേചന വകുപ്പ് പൈപ്പ് സ്ഥാപിക്കാനായി കഴിഞ്ഞ വര്‍ഷം ജനതപ്പടി-പാടിക്കുന്ന്-ഗിരിജന്‍ കോളനി റോഡ് ജെ.സി.ബി ഉപയോഗിച്ച് 600 മീറ്ററോളം പകുതി ഭാഗം പൊളിച്ചിരുന്നു. ഇത് ഒരു വര്‍ഷം കഴിഞ്ഞിട്ടും നന്നാക്കിയില്ല. ഇതില്‍ പ്രതിഷേധിച്ചാണ് ജനകീയ സമിതിയുടെ നേതൃത്വത്തില്‍ നഗരസഭാ സെക്രട്ടറിക്ക് നിവേദനം നല്‍കിയത്. ഈ റോഡ് പാടിക്കുന്ന് നിവാസികളുടേയും, സ്‌കൂളിലേക്ക് പോകുന്ന കുട്ടികളുടേയും, പൊട്ടിപ്പാറ, മണലൊടി ഭാഗത്തു നിന്നും നിലമ്പൂരിലെ വിവിധ സ്‌കൂളുകളിലേക്ക് പോകുന്ന പ്രധാന റോഡുകൂടിയാണ്. കൂടാതെ നിലമ്പൂര്‍ ടൗണില്‍ നിന്നും റെയില്‍വെ സ്റ്റേഷനിലേക്കുള്ള ബൈപ്പാസ് റോഡായും നാട്ടുകാര്‍ ഇത് ഉപയോഗിച്ചു വരുന്നതായും നിവേദനത്തില്‍ പറയുന്നു. കുടിവെള്ള പദ്ധതി നീണ്ടുപോകുന്ന കാരണം നിരത്തി പ്രദേശത്തെ ജനങ്ങളുടെ റോഡ് തടസ്സപ്പെടുത്തുന്നത് പ്രതിഷേധാര്‍ഹമാണെന്നും ജനകീയ സമിതി കുറ്റപ്പെടുത്തി. കൗണ്‍സിലര്‍ സുബൈദ തട്ടാരശ്ശേരി, ഉണ്ണീന്‍കുട്ടി, ഇബ്രാഹീം പൂളക്കല്‍, കെ.ടി നൗഫല്‍, ഷിബു, ഷമീര്‍, പി.കെ യൂനുസ്, പി.ടി കുഞ്ഞാപ്പ നേതൃത്വം നല്‍കി.