മോണ്ട്‌റിയല്‍: കനേഡിയന്‍ ഗ്രാന്‍ പ്രി ഫോര്‍മുല വണ്‍ കിരീടം മെഴ്‌സിഡസിന്റെ ബ്രിട്ടീഷ് ഡ്രൈവര്‍ ലൂയീസ് ഹാമില്‍ട്ടന്. സീസണിലെ തുടര്‍ച്ചയായ രണ്ടാം കിരീടം നേടിയ ഹാമില്‍ട്ടന്‍ കഴിഞ്ഞ തവണ ഇവിടെ സ്വന്തമാക്കിയ ചാംപ്യന്‍ പട്ടം നിലനിര്‍ത്തുകയും ചെയ്തു. തന്റെ വിജയം ബോക്‌സിങ് ഇതിഹാസം മുഹമ്മദ് അലിക്കു സമര്‍പ്പിക്കുന്നതായി അദ്ദേഹം മത്സര ശേഷം വ്യക്തമാക്കി. ഫെരാരിയുടെ സെബാസ്റ്റ്യന്‍ വെറ്റല്‍ രണ്ടാം സ്ഥാനത്തും വില്ല്യംസിന്റെ വല്‍ട്ടേരി ബോട്ടാസ് മൂന്നാം സ്ഥാനവും സ്വന്തമാക്കി. റെഡ് ബുള്ളിന്റെ കൗമാര താരം മാക്‌സ് വെര്‍സ്റ്റപ്പെന്‍ നാലാമതെത്തി. മെഴ്‌സിഡസിലെ ഹാമില്‍ട്ടന്റെ സഹതാരവും സീസണില്‍ മികച്ച ഫോമിലുമുള്ള നിക്കോ റോസ്ബര്‍ഗ് അഞ്ചാം സ്ഥാനത്തേക്ക് പിന്തള്ളപ്പെട്ടു. ഫോഴ്‌സ് ഇന്ത്യാ താരങ്ങളായ നിക്കോ ഹൂക്കന്‍ബര്‍ഗ് എട്ടാം സ്ഥാനത്തും സെര്‍ജിയോ പെരസ് പത്താം സ്ഥാനത്തും ഫിനിഷ് ചെയ്തു.