വയനാട്: ജില്ലക്കെതിരെ ഗുരുതര അധിക്ഷേപ പരാമര്‍ശവുമായി ബിജെപി ദേശീയ വക്താവ് പ്രദീപ് ഭണ്ഡാരി. 500 ലധികം സ്ത്രീപീഡനങ്ങള്‍ ജില്ലയില്‍ നടന്നെന്നും ലഹരിയുടെ കേന്ദ്രമായി നാട് മാറിയെന്നും ബി.ജെ.പി നേതാവ് എക്‌സില്‍ കുറിച്ചു. കോണ്‍ഗ്രസ് നേതാവും, മുന്‍ വയനാട് മണ്ഡലം എംപിയുമായിരുന്ന രാഹുല്‍ ഗാന്ധിക്കെതിരായ പോസ്റ്റിലാണ് ജില്ലക്കെതിരെ ഗുരുതര ആരോപണങ്ങളുള്ളത്. 

'എം.പിയെന്ന നിലയില്‍ രാഹുല്‍ ഗാന്ധി വയനാടിന്റെ ജനവിധിയെ വഞ്ചിച്ചു. വയനാടിനെ ലഹരിയുടെ വിഹാരകേന്ദ്രമാക്കി മാറ്റി. 500 ലധികം ബലാത്സംഗങ്ങളുണ്ടായി, ഇരകളെ ആശ്വസിപ്പിക്കാന്‍ ഒരു സന്ദര്‍ശനം പോലും നടത്തിയില്ല,' പ്രദീപ് ഭണ്ഡാരി കുറിച്ചു. 

മാത്രമല്ല കോണ്‍ഗ്രസ് ജനങ്ങളെ നിസാരമായി കാണുകയാണെന്നും, വോട്ട് ബാങ്ക് ഉറപ്പിക്കാനായി വര്‍ഗീയ രാഷ്ട്രീയം കളിക്കുകയാണെന്നും, പ്രിയങ്ക ഗാന്ധിയുടെ സ്ഥാനാര്‍ഥിത്വം പൂര്‍ണ്ണമായും നിരാകരിക്കപ്പെടുമെന്നും പ്രദീപ് എക്‌സില്‍ കുറിച്ചു. മാത്രമല്ല ഉരുള്‍പൊട്ടല്‍ മുന്നറിയിപ്പുകള്‍ അവഗണിചത് 2019, 2021, 2022, 2024 വര്‍ഷങ്ങളില്‍ നൂറുകണക്കിന് പേരുടെയും മരണത്തിലേക്ക് നയിച്ചെന്നും കുറിപ്പിലുണ്ട്. 

വയനാട് ലോക്‌സഭ മണ്ഡലത്തിലെ ജനങ്ങള്‍ക്കായി പ്രിയങ്ക ഗാന്ധി കഴിഞ്ഞ ദിവസം കത്തെഴുതിയതിന് പിന്നാലെയാണ് ബി.ജെ.പി വക്താവിന്റെ അധിക്ഷേപ പരാമര്‍ശം. ഡല്‍ഹിയില്‍ രാഹുല്‍ ഗാന്ധി ഇഫ്താര്‍ വിരുന്നില്‍ പങ്കെടുക്കുന്ന ചിത്രം സഹിതമായിരുന്നു അധിക്ഷേ പോസ്റ്റ്. യഥാര്‍ഥ ചിത്രത്തില്‍ മുന്‍ രാഷ്ട്രപതിമാരായ പ്രതിഭാ പാട്ടീലും, പ്രണബ് മുഖര്‍ജിയുമെല്ലാമുണ്ട്. ഇവരെ ക്രോപ് ചെയ്താണ് രാഹുല്‍ ഗാന്ധ മുസ് ലിം തൊപ്പിയണിഞ്ഞ് നില്‍ക്കുന്ന ചിത്രം പോസ്റ്റ് ചെയ്തത്. 

Wayanad became a hub for drug addiction with more than 500 rapes BJP spokesperson with anti-district offensive post