കല്‍പ്പറ്റ: ഗൂഡലായികുന്നില്‍ കഴിഞ്ഞ ഒരു മാസമായി ഭീതി പരത്തുന്ന പുലി മൂന്നാം ദിവസവും വനംവകുപ്പ് സ്ഥാപിച്ച കെണിയില്‍ കുടുങ്ങിയില്ല.
ഗുഡലായികുന്നിന് 400 മീറ്റര്‍ മാറി സ്വകാര്യ തോട്ടത്തില്‍ പുലിയെ പിടികൂടാന്‍ കൂട് സ്ഥാപിച്ചത് മൂന്ന് ദിവസം മുന്‍പാണ്. പുലിയെ കൂടിലേക്ക് ആകര്‍ഷിക്കാന്‍ കൂടിനുള്ളില്‍ പട്ടിയെ കെട്ടിയിട്ടുണ്ട്. കഴിഞ്ഞ ദിവസം കൂടിനടുത്ത് വരെ പുലി എത്തിയിരുന്നു. കൂടിന് സമീപത്ത് പുലിയുടെയും കുഞ്ഞിന്റെയും കാല്‍പാടുകള്‍ കണ്ടെത്തിയിട്ടുണ്ട്. കഴിഞ്ഞ ദിവസവും രാത്രിയില്‍ ബൈപ്പാസിന് സമീപം പുലിയെയും രണ്ട് കുഞ്ഞുങ്ങളേയും നാട്ടുകാര്‍ കണ്ടിരുന്നു. അടുത്ത ദിവസം തന്നെ പുലി കെണിയില്‍ വീഴുമെന്ന പ്രതീക്ഷയിലാണ് വനംവകുപ്പും ഗൂഡലായികുന്ന് നിവാസികളും. കെണി ഒരുക്കിയ സ്ഥലത്തിന് മീറ്ററുകള്‍ മാറി വനപാലകര്‍ രാത്രിയിലും കാവല്‍ നില്‍ക്കുന്നുണ്ട്. പിടിയിലായാല്‍ രണ്ട് മണിക്കൂറുകള്‍ക്കകം സ്ഥലത്ത് നിന്നും സുരക്ഷിത സ്ഥലത്തേക്ക് മാറ്റാനാണ് വനംവകുപ്പിന്റെ നീക്കം.