മുംബൈ: മദ്യരാജാവും മുന്‍ എം.പിയുമായിരുന്ന വിജയ് മല്യയെ കോടതി പിടികിട്ടാപ്പുള്ളിയായി പ്രഖ്യാപിച്ചു. എന്‍ഫോഴ്‌സ്‌മെന്റ് ഡയറക്ടറേറ്റിന്റെ ഹരജിയിലാണ് ഉത്തരവ്. മല്യയുടെ സ്വത്തുക്കള്‍ കണ്ടുകെട്ടാനും കോടതി ഉത്തരവിട്ടു.

കള്ളപ്പണക്കേസ് കൈകാര്യം ചെയ്യുന്ന പ്രത്യേക കോടതിയാണ് മല്യയെ പിടികിട്ടാപ്പുള്ളിയായി പ്രഖ്യാപിച്ചത്.

മല്യയുടെ 1411 കോടിരൂപ വിലവരുന്ന സ്വത്തുക്കള്‍ എന്‍ഫോഴ്‌സ്‌മെന്റ് ഡയറക്ടറേറ്റ് കഴിഞ്ഞ ദിവസം കണ്ടുകെട്ടിയിരുന്നു. ഐഡിബിഐ ബാങ്കില്‍ നിന്നെടുത്ത 900 കോടി രൂപയുടെ കടം തിരിച്ചടയ്ക്കാത്ത കേസിലാണു നടപടി.

ഇന്ത്യയിലെ വിവിധ ബാങ്കുകളില്‍നിന്നായി ഒന്‍പതിനായിരത്തിലധികം കോടി രൂപ വായ്പയെടുത്തു ബ്രിട്ടനിലേക്കു നാടുവിടുകയായിരുന്നു മല്യ. രാജ്യം വിട്ടശേഷം എന്‍ഫോഴ്‌സ്‌മെന്റ് ഡയറക്ടേറ്റ് മൂന്നു തവണ സമന്‍സ് അയച്ചിരുന്നെങ്കിലും മല്യ അവഗണിക്കുകയാണ് ചെയ്തത്. രാജ്യസഭാംഗമായിരുന്ന മല്യയെ പുറത്താക്കണമെന്നാവശ്യപ്പെട്ട് പാര്‍ലമെന്റ് എത്തിക്‌സ് കമ്മിറ്റി റിപ്പോര്‍ട്ട് നല്‍കിയെങ്കിലും എം.പി പദവി മല്യ രാജിവച്ചിരുന്നു.