വടകര: 400ലധികം വൃക്കരോഗികളുടെ സൗജന്യ ഡയാലിസിസിന് പണം കണ്ടെത്താനായി വടകര മുനിസിപ്പാലിറ്റി തലത്തില്‍ കണ്‍വന്‍ഷന്‍ നടത്തി. രോഗം രോഗിയുടെ മാത്രമല്ല സമൂഹത്തിന്റെ കൂടി വേദനയാണെന്നും കൂട്ടായ പ്രയത്‌നത്തിലൂടെ ചികിത്സ ലഭ്യമാക്കാന്‍ നാം ബാധ്യസ്ഥരാണെന്നും ചടങ്ങ് ഉദ്ഘാടനം ചെയ്ത മുനിസിപ്പല്‍ ചെയര്‍മാന്‍  കെ. ശ്രീധരന്‍ വ്യക്തമാക്കി.
 2015 മെയ് ഒന്‍പത്, 10 തിയതികളില്‍ സ്വരൂപീച്ച രണ്ടേകാല്‍ കോടി രൂപയും കാരുണ്യ, സ്‌നേഹസ്പര്‍ശം തുടങ്ങിയവ മുഖേന ലഭിച്ച തുകയും വ്യക്തികളില്‍ നിന്നു ലഭിച്ചിട്ടുള്ള തുകയും കൂടി ചേര്‍ത്താണ് 20 മാസക്കാലം സൗജന്യമായി ഡയാലിസിസ് ചെയ്തുവന്നത്.
ഇപ്പോള്‍ വിവിധ സ്ഥലങ്ങളില്‍ നിന്നുള്ള 400 ലധികം പേര്‍ തണലില്‍ നിന്നു സൗജന്യ ഡയാലിസിസ് ചെയ്യുന്നുണ്ട്. സാമ്പത്തിക പ്രയാസം കാരണം ഇവരുടെ ചികിത്സ  മുന്നോട്ടുകൊണ്ട് പോകാന്‍ കഴിയാത്ത അവസ്ഥ വന്നതോടെ വീണ്ടും ജനങ്ങളിലേക്ക് ഇറങ്ങാന്‍ തണല്‍ നിധി ജനകീയ കൂട്ടായ്മ തീരുമാനിക്കുകയായിരുന്നു.
ഏപ്രില്‍ എട്ട്, ഒന്‍പത് തിയതികളിലാണ് വിഭവ സമാഹരണാര്‍ഥം വീടുകളില്‍ തണല്‍നിധി പ്രവര്‍ത്തകര്‍ എത്തുക. ഏപ്രില്‍ ഒന്ന്, രണ്ട് തിയതികളില്‍ ഒന്നാം ഘട്ട വീടുകയറലും, എട്ട്, ഒമ്പത് തിയതികളില്‍ സമാഹരണത്തെ കുറിച്ചുള്ള ബോധവല്‍കരണം നടത്തുകയും ചെയ്യും.
22 പഞ്ചായത്തുകളിലും നാലു മുനിസിപ്പാലിറ്റികളിലുമായി 1,500 വാര്‍ഡുകളിലായാണ് ധനശേഖരണം നടക്കുക. പല പഞ്ചായത്തുകളിലും മുനിസിപ്പാലിറ്റിയിലും കമ്മിറ്റികള്‍ നിലവില്‍ വന്നുകഴിഞ്ഞു. 20ന്  മുമ്പായി വാര്‍ഡ് തല കമ്മിറ്റികള്‍ നിലവില്‍ വരും.
പഞ്ചായത്ത് തല കമ്മിറ്റിയുടെ ചെയര്‍മാന്‍ പഞ്ചായത്ത് പ്രസിഡന്റും, മുനിസിപ്പല്‍ തലത്തില്‍ മുനിസിപ്പല്‍ ചെയര്‍മാനും, വാര്‍ഡു തലത്തില്‍ വാര്‍ഡു മെമ്പര്‍മാരും ചെയര്‍മാന്‍മാരായാണ് കമ്മിറ്റി രൂപീകരിക്കുക.
 ഇപ്പോള്‍ വടകരയിലും അരിക്കുളത്തും, നാദാപുരത്തുമാണ് തണലിന്റെ സൗജന്യ ഡയാലിസിസ് യൂനിറ്റുകള്‍ പ്രവര്‍ത്തിക്കുന്നത്. കണ്‍വന്‍ഷനുകളിലെ ജനപങ്കാളിത്തം വൃക്കരോഗികളില്‍ ഏറെ പ്രതീക്ഷ നല്‍കുന്നതായി തണല്‍ ചെയര്‍മാന്‍ ഡോ. ഇദ്‌രീസ് പറഞ്ഞു. വൈസ് ചെയര്‍മാന്‍ ബിന്ദു അധ്യക്ഷയായി. കൗണ്‍സിലര്‍ ഗീത സ്വാഗതവും, ടി.ഐ നാസര്‍ നന്ദിയും പറഞ്ഞു.