തിരുവമ്പാടി: ജില്ലയുടെ കിഴക്കന്‍ മലയോരത്ത്  കുടിയേറ്റത്തിനൊപ്പം തുടക്കം കുറിച്ച തിരുവമ്പാടി സേക്രഡ് ഹാര്‍ട്ട് യു.പി സ്‌കൂള്‍ സപ്തതിയുടെ നിറവിലേക്ക്. 1947ല്‍ തുടക്കം കുറിച്ച വിദ്യാലയത്തിന്റെ ഒരു വര്‍ഷം നീണ്ടു നില്‍ക്കുന്ന സപ്തതി ആഘോഷങ്ങള്‍ക്ക് ഇന്ന് തുടക്കമാവും. താമരശ്ശേരി രൂപതാധ്യക്ഷന്‍ മാര്‍ റമീജിയോസ് ഇഞ്ചനാനിയില്‍ ഉദ്ഘാടനം ചെയ്യും. കോര്‍പ്പറേറ്റ് മാനേജര്‍ ഫാദര്‍ സെബാസ്റ്റ്യന്‍ പുരയിടത്തില്‍, സ്‌കൂള്‍ മാനേജര്‍ ഫാദര്‍ അബ്രാഹം വള്ളോപ്പിള്ളി, പഞ്ചായത്ത് പ്രസിഡന്റ്, ജനപ്രതിനിധികള്‍ തുടങ്ങിയവര്‍ ഉദ്ഘാടന ചടങ്ങില്‍ പങ്കെടുക്കും. 2018 ഫെബ്രുവരി വരെ നീണ്ടുനില്‍ക്കുന്ന ആഘോഷങ്ങളില്‍ നിരവധി പരിപാടികളാണ് ആസൂത്രണം ചെയ്തിരിക്കുന്നത്.
 സപര്യ 2017  (നൃത്ത പരിശീലനം), സപ്തതി മന്ദിര നിര്‍മാണാരംഭം, പൂര്‍വവിദ്യാര്‍ഥി സംഗമം, വനിത സെമിനാര്‍, മുന്‍ മാനേജര്‍മാര്‍, അധ്യാപകര്‍ എന്നിവരുടെ സംഗമം, വിദ്യാര്‍ഥി ഭവന സന്ദര്‍ശനം, രക്ഷാകര്‍തൃ ക്വിസ്, കുടിയേറ്റ ചരിത്ര സെമിനാര്‍, മിമിക്‌സ്  ഗാനമേള, കലാമത്സരങ്ങള്‍, എക്‌സിബിഷന്‍, മാധ്യമ സെമിനാര്‍, സപ്തതി സമാപനം തുടങ്ങി വിവിധ പരിപാടികള്‍ ഒരു വര്‍ഷത്തിനുള്ളില്‍ സംഘടിപ്പിക്കുമെന്ന് സ്‌കൂളില്‍ വിളിച്ചുചേര്‍ത്ത വാര്‍ത്താസമ്മേളനത്തില്‍ ജനറല്‍ കണ്‍വീനര്‍ അഗസ്റ്റിന്‍ മീത്തിപറമ്പില്‍, പി.ടി.എ പ്രസിഡന്റ് സാബു പാറാങ്കല്‍, ജോളി മാത്യു, അബ്ദുല്‍ മജീദ്, ജിബിന്‍ പോള്‍, ദിലീപ് മാത്യു, റോയി ജോസഫ് തുടങ്ങിയവര്‍ പറഞ്ഞു.