ഇരിട്ടി: എടപ്പുഴ വാളത്തോട് വന്‍ തീപിടുത്തമുണ്ടായി. കണ്ണൂര്‍ വനം ഡിവിഷനിലെ ഇരിട്ടി സെക്ഷന്‍ പരിധിയില്‍ വനത്തോട് ചേര്‍ന്ന പേരാവൂര്‍ മുരിങ്ങോടിയിലെ അമൃതകൃപയില്‍ പ്രഭാകരന്‍, ആറളം വാക്കേറ്റത്തില്‍ റെന്നി എന്നിവരുടെ ഉടമസ്ഥതയിലുള്ള സ്ഥലത്താണ് തീപിടിത്തമുണ്ടായത്. അഞ്ചുവര്‍ഷം പ്രായമായ റബര്‍ മരങ്ങള്‍ ഉള്‍പ്പെടുന്ന നാലേക്കറോളം സ്ഥലമാണ് കത്തി നശിച്ചത്. പ്രദേശവാസികളും ഫോറസ്റ്റ് അധികൃതരും അഗ്‌നിശമന സേനയും കഠിന പ്രയത്‌നത്തിലൂടെയാണ് വനത്തിലേക്ക് തീ പടരുന്നത് തടഞ്ഞത്. കഴിഞ്ഞ ദിവസം കളിതട്ടും പാറയില്‍ അതിര്‍ത്തിയിലെ റബര്‍ തോട്ടത്തിന് തീ പിടിച്ച് രണ്ടര ഏക്കറും ഒരാഴ്ച മുമ്പ് ചതിരൂര്‍ നീലായ്മലയില്‍ ഏഴേക്കറോളം വനവും കത്തി നശിച്ചിരുന്നു.