പാലക്കാട്: കരിമ്പ അപകടത്തിൽ അടിയന്തര ഇടപെടൽ തേടി പാലക്കാട് എംപി വി കെ ശ്രീകണ്ഠൻ കേന്ദ്രമന്ത്രി നിതിൻ ഗഡ്കരിക്ക് കത്തയച്ചു. അശാസ്ത്രീയ നിർമാണത്തിന് പരിഹാരം ആവശ്യമാണ്. ദുബൈ കുന്നിനും യുപി സ്കൂളിനും ഇടയിൽ അപകടം തുടർക്കഥയാണ്. അശാസ്ത്രീയ നിർമാണം പരിഹരിച്ച് വളവിൽ പുനർനിർമാണം വേണമെന്നും എംപി കത്തിൽ ആവശ്യപ്പെട്ടു.

പാലക്കാട് പനയമ്പാടം സ്കൂള്‍ വിദ്യാര്‍ത്ഥികള്‍ക്ക് ഇടയിലേക്ക് ലോറി ഇടിച്ചുകയറിയുണ്ടായ അപകടത്തിൽ നാല് കുട്ടികളാണ് മരിച്ചത്. സ്ഥിരം അപകട മേഖലയാണിതെന്ന് നാട്ടുകാർ പറഞ്ഞു. നിരവധി തവണ അധികൃതരോട് പരാതിപ്പെട്ടിട്ടും നടപടിയുണ്ടാവാത്ത സാഹചര്യത്തിൽ നാട്ടുകാർ ഇവിടെ പ്രതിഷേധിച്ചിരുന്നു. 

55 അപകടങ്ങൾ ഇവിടെ നടന്നിട്ടുണ്ടെന്ന് 2022ൽ നിയമസഭയിൽ ശ്രദ്ധ ക്ഷണിക്കലിൽ കോങ്ങാട് എംഎൽഎ കെ ശാന്തകുമാരി പറഞ്ഞിരുന്നു. ഏഴു മരണമുണ്ടായിട്ടുണ്ടെന്നും 65 പേർക്ക് പരിക്കേറ്റിട്ടുണ്ടെന്നും കോങ്ങാട് എംഎൽഎ അന്ന് നിയമസഭയിൽ പറഞ്ഞിരുന്നു. കൂടാതെ അപകടത്തിന് കാരണം നിർമ്മാണത്തിലെ അശാസ്ത്രീയതയാണെന്നും എംഎൽഎ വ്യക്തമാക്കിയിരുന്നു.

MP V K Sreekandan has written to Union Minister Nitin Gadkari seeking urgent intervention in the Palakkad accident.