പാലക്കാട്: പാലക്കാട്-കോഴിക്കോട് ദേശീയപാതയില്‍ വീണ്ടും അപകടം. ദേശീയപാതയിലെ ചൂരിയോട് രണ്ടിടങ്ങളിലായാണ് അപകടം നടന്നത്. 12 മണിയോടെ മണ്ണാര്‍ക്കാട്ടേക്ക് പോവുകയായിരുന്ന സ്വകാര്യ ബസിനു പിന്നില്‍ പിക്കപ്പ് വാന്‍ ഇടിച്ചു കയറിയായിരുന്നു ആദ്യ അപകടമുണ്ടായത്.

പിന്നാലെ 200 മീറ്റര്‍ മാറി ടിപ്പര്‍ ലോറിയും ചരക്കു ലോറിയും കൂട്ടിയിടിച്ചു. ബ്രേക്ക് പിടിച്ചിട്ട് കിട്ടാതായതാണ് അപകടത്തിന് കാരണമെന്ന് പൊലിസ് പറഞ്ഞു. ചാറ്റല്‍മഴയുള്ളതിനാല്‍ വാഹനം തെന്നിമാറിയതാണ് അപകടകാരണമെന്ന് ദൃക്ഷസാക്ഷികള്‍ പറഞ്ഞു. അപകടത്തില്‍ ആര്‍ക്കും പരുക്കില്ലെന്നാണ് വിവരം. 

ഇന്നലെ പാലക്കാട് പനയമ്പാടത്ത് ലോറി നിയന്ത്രണം വിട്ട് സ്‌കൂള്‍ കുട്ടികളിലേക്ക് പാഞ്ഞുകയറി നാലു വിദ്യാര്‍ത്ഥിനികള്‍ മരിച്ചിരുന്നു.