ന്യൂഡല്‍ഹി: ഘാന, ഐവറി കോസ്റ്റ്, നമീബിയ എന്നീ ആഫ്രിക്കന്‍ രാജ്യങ്ങളിലെ രാഷ്ട്രപതി പ്രണബ് മുഖര്‍ജിയുടെ സന്ദര്‍ശനത്തിനു പിന്നാലെ പ്രധാനമന്ത്രി നരേന്ദ്ര മോദിയും ആഫ്രിക്കന്‍ രാജ്യങ്ങളില്‍ സന്ദര്‍ശനത്തിനൊരുങ്ങുന്നു. ഘാനയിലെ ഇന്ത്യന്‍ ഹൈക്കമ്മഷീഷണര്‍ നല്‍കിയ സ്വീകരണത്തില്‍ ഇന്ത്യന്‍ സമൂഹത്തോട് സംസാരിക്കവേ രാഷ്ട്രപതി തന്നെയാണ് ഇക്കാര്യം അറിയിച്ചത്.

ഇന്ത്യയ്ക്കും ആഫ്രിക്കയ്ക്കും ഇടയില്‍ നീണ്ട കാലത്തെ ബന്ധമാണുള്ളതെന്ന് പ്രണബ് മുഖര്‍ജി പറഞ്ഞു. കുറച്ചുദിവസം മുന്‍പ് ഉപരാഷ്ട്രപതി ഹാമിദ് അന്‍സാരി ആഫ്രിക്കന്‍ രാജ്യങ്ങളായ തുനീഷ്യയിലും മൊറോക്കോയിലും സന്ദര്‍ശനം നടത്തിയിരുന്നു. എനിക്കു പിന്നാലെ പ്രധാനമന്ത്രി നാലോ അഞ്ചോ ആഫ്രിക്കന്‍ രാജ്യങ്ങളിലെത്തുന്നുണ്ട്. ആഫ്രിക്കയോടൊപ്പം ഇന്ത്യയുണ്ടെന്നറിയിക്കാനാണിതെന്നും പ്രണബ് പറഞ്ഞു.