ക്യാംപ്നൗ: സ്പാനിഷ് ലീഗ് ലാലിഗയില്‍ ബാഴ്‌സലോണക്ക് തകര്‍പ്പന്‍ ജയം. ലെഗാനസിനെ ഒന്നിനെതിരേ മൂന്ന് ഗോളുകള്‍ക്കാണ് നിലവിലെ ചാംപ്യന്മാര്‍ പരാജയപ്പെടുത്തിയത്. ജയത്തോടെ ബാഴ്‌സലോണ ലീഗില്‍ അത്‌ലറ്റികോ മാഡ്രിഡുമായുള്ള പോയിന്റ് ലീഡ് അഞ്ചാക്കി ഉയര്‍ത്തി.
എം.സി.ഡി സഖ്യം ഗോള്‍ കണ്ടെത്തിയ മത്സരത്തില്‍ മികച്ച പ്രകടനമാണ് ബാഴ്‌സലോണ കാഴ്ചവച്ചത്. 32ാം മിനുട്ടില്‍ ഡെബലെയാണ് ബാഴ്‌സയുടെ ഗോള്‍വേട്ടക്ക് തുടക്കമിട്ടത്. പക്ഷേ 57ാം മിനുട്ടില്‍ മാര്‍ട്ടിന്‍ ബ്രാത്‌വെയ്റ്റിലൂടെ ലെഗാനസ് സമനില നേടി. 71ാം മിനുട്ടില്‍ സുവാരസിലൂടെ ലീഡ് നേടിയ ബാഴ്‌സലോണ 92ാം മിനുട്ടില്‍ സൂപ്പര്‍താരം ലയണല്‍ മെസ്സിയിലൂടെ മൂന്നാംഗോളും നേടി. സീസണില്‍ 20 മത്സരങ്ങള്‍ കഴിഞ്ഞപ്പോള്‍ 14 വിജയവും നാല് സമനിലയും രണ്ട് തോല്‍വിയുമടക്കം 46 പോയിന്റുമായി ബാഴ്‌സലോണയാണ് പട്ടികയില്‍ ഒന്നാമതുള്ളത്. രണ്ടാം സ്ഥാനത്തുള്ള അത്‌ലറ്റികോ മാഡ്രിഡിന് 41ഉം മൂന്നാമതുള്ള റയല്‍ മാഡ്രിഡിന് 36 പോയിന്റുമാണ് നിലവില്‍.
ഇറ്റാലിയന്‍ ലീഗ് സീരി എയില്‍ നടന്ന മത്സരത്തില്‍ ശക്തരായ നാപോളി 2-1ന് ലാസിയോയെ പരാജയപ്പെടുത്തി. 34ാം മിനുട്ടില്‍ ജോസെ കല്ലിഹോന്‍, 37ാം മിനുട്ടില്‍ മിലിക് എന്നിവരാണ് നാപോളിക് വേണ്ടി ഗോള്‍ നേടിയത്. 65ാം മിനുട്ടില്‍ ഇമ്മോബീല്‍ ലാസിയോക്ക് വേണ്ടി ഒരു ഗോള്‍ മടക്കി. സീരി എയിലെ രണ്ടാം സ്ഥാനക്കാരാണ് നാപോളി.