തിരുവനന്തപുരം: അവിനാശി ബസ്സപകടത്തില്‍ മരിച്ച കെ.എസ്.ആര്‍.ടി.സി ജീവനക്കാരായ ഗിരീഷിന്റേയും ബൈജുവിന്റേയും വിയോഗത്തില്‍ മുഖ്യമന്ത്രി പിണറായി വിജയന്‍ ദുഃഖം രേഖപ്പെടുത്തി.
കെ.എസ്.ആര്‍.ടി.സിയെ സംബന്ധിച്ചിടത്തോളം അവര്‍ മികച്ച ജീവനക്കാരായിരുന്നെന്നും അതിലുമുപരി മാതൃകയാക്കേണ്ട രണ്ടു മനുഷ്യസ്‌നേഹികളായിരുന്നെന്നും അദ്ദേഹം പറഞ്ഞു.
കഴിഞ്ഞ വര്‍ഷം യാത്രയ്ക്കിടയില്‍ ഗുരുതരമായ രോഗാവസ്ഥ നേരിടേണ്ടിവന്ന യുവതിക്കു ചികിത്സ നല്‍കാന്‍ അവര്‍ കാണിച്ച സേവനസന്നദ്ധതയും ത്യാഗവും ജനശ്രദ്ധ ആകര്‍ഷിച്ച വാര്‍ത്തയായിരുന്നു. ആ സംഭവം സഹജീവികളോടുള്ള അവരുടെ കരുതലിന്റെയും സ്‌നേഹത്തിന്റെയും ആഴം എത്രയെന്ന് ബോധ്യപ്പെടുത്തി.
അവര്‍ കാണിച്ച പാത അനുകരണീയമാണ്. ബൈജുവിനും ഗിരീഷിനും ആദരാഞ്ജലികള്‍ അര്‍പ്പിക്കുന്നതിനൊപ്പം കുടുംബാംഗങ്ങളുടെയും സഹപ്രവര്‍ത്തകരുടെയും ദുഃഖത്തില്‍ പങ്കുചേരുന്നതായും അദ്ദേഹം പറഞ്ഞു.