ഇരിക്കൂര്‍: ഇരിക്കൂര്‍-ചാലോട് റോഡില്‍ കൊളോളം യു.പി സ്‌കൂള്‍ വഴിയരികിലെ പാതയോരത്ത് വര്‍ഷങ്ങളായി ഉപയോഗിക്കാതെ കിടക്കുന്ന പൊട്ടക്കിണര്‍ അപകട ഭീഷണിയാവുന്നു.
മുബാറക് സ്റ്റോറിനു മുന്‍പിലെ ഇന്ദിരാഗാന്ധി ആര്‍ട്‌സ് ആന്‍ഡ് സ്‌പോര്‍ട്‌സ് ക്ലബ്ബിനോട് ചേര്‍ന്നു കിടക്കുന്നതാണ് കിണര്‍.
രാത്രി കാലങ്ങളില്‍ ബസിറങ്ങി നടക്കുന്നവര്‍ പോലും അബദ്ധത്തില്‍ കിണറില്‍ വീഴാന്‍ സാധ്യതയുണ്ട്.
കിണര്‍ മൂടുകയോ നന്നാക്കി കല്ലു കെട്ടി സംരക്ഷിക്കുകയോ ചെയ്തില്ലെങ്കില്‍ വഴിയാത്രക്കാര്‍ വീണു മരിക്കാനും മൃഗങ്ങള്‍ വീണ് ചാവാനും ഇടയുണ്ട്.
പഞ്ചായത്ത് ഓഫിസിനു വിളിപ്പാടകലെയുള്ള ഈ അപകടക്കിണറിനെ അധികൃതര്‍ കണ്ടില്ലെന്ന് നടിക്കുകയാണ്. ഒരു ദുരന്തം വരുന്നതു വരെ ഈ അപകട കിണര്‍ നിലനിര്‍ത്താനാണ് അധികൃതരുടെ നടപടിയെന്നാണോ എന്നാണ് നാട്ടുകാര്‍ ചോദിക്കുന്നത്.