കിളിമാനൂര്‍: സംസ്ഥാന പാതയില്‍ കിളിമാനൂരിന് സമീപം പൊരുന്തമണില്‍ ഇന്നോവ കാറും ടിപ്പര്‍ ലോറിയും കൂട്ടിയിടിച്ച് ഏഴു പേര്‍ക്ക് പരുക്കേറ്റു . ഇവരെ വെഞ്ഞാറമൂട്ടിലെ സ്വകാര്യ മെഡിക്കല്‍ കോളജില്‍ പ്രവേശിപ്പിച്ചു.കാര്‍ യാത്രികരായ  കരമന ലത്തീഫ് മന്‍സിലില്‍ ലത്തീഫ് (56), സഫീല (52), റഷീദ (54), വാഹിദ (52), മിജാസ് (27), ഫസല്‍ (28) എന്നിവര്‍ക്കും ടിപ്പര്‍ ഡ്രൈവര്‍ക്കുമാണ് പരുക്കേറ്റത് .ആരുടേയും നില ഗുരുതരമല്ല.
ഇന്നലെ പകല്‍ രണ്ടരയോടെയായിരുന്നു അപകടം. കാരേറ്റ് നിന്നും കിളിമാനൂര്‍ ഭാഗത്തേക്ക് വരികയായിരുന്ന ടിപ്പറും എതിര്‍ ദിശയില്‍ തിരുവനന്തപുരം ഭാഗത്തേക്ക് പോവുകയായിരുന്ന കാറും കൂട്ടിയിടിക്കുകയായിരുന്നു. കാര്‍ പൂര്‍ണമായി തകര്‍ന്നു .നിയന്ത്രണം വിട്ട ടിപ്പര്‍ മറിയുകയും ചെയ്തു.
റോഡിനിരുവശവും ഇവിടെ കേബിള്‍ കുഴയെടുക്കലും മറ്റും നടക്കുന്നുണ്ട്. മണ്ണും മറ്റും വീണും  ചാറ്റല്‍ മഴ മൂലവും റോഡില്‍  കാര്‍ തെന്നിയതാണ് അപകടത്തിന് കാരണമായതെന്ന് കരുതുന്നു. കിളിമാനൂര്‍ പൊലിസ് കേസെടുത്തു.