കൊല്ലം: കുളത്തൂപ്പുഴയില്‍ പാകിസ്താന്‍ നിര്‍മിത വെടിയുണ്ട കണ്ടെത്തിയ സംഭവത്തില്‍ അന്വേഷണം തീവ്രവാദ, മാവോയിസ്റ്റ് സംഘടനകളിലേക്ക് നീളുന്നു. വെടിയുണ്ടകള്‍ ഉപേക്ഷിച്ചതാണെന്ന വാദം തള്ളി കേന്ദ്ര, സംസ്ഥാന അന്വേഷണ ഏജന്‍സികള്‍ രംഗത്തെത്തി.
സംഭവം അന്വേഷിക്കുന്ന ഡി.ഐ.ജി അനൂപ് ജോണ്‍ കുരുവിളയുടെ നേതൃത്വത്തിലുള്ള പ്രത്യേക സംഘം സംസ്ഥാനത്തിനകത്തും പുറത്തും അന്വേഷണം ആരംഭിച്ചു.
പാകിസ്താന്‍ സൈന്യത്തിന് വെടിക്കോപ്പുകള്‍ നിര്‍മിക്കുന്ന സ്ഥാപനത്തില്‍ നിര്‍മിച്ച 14 വെടിയുണ്ടകളാണ് കുളത്തൂപ്പുഴയില്‍നിന്ന് കണ്ടെടുത്തത്.
മലയോര ഹൈവെയായി നവീകരിക്കുന്നതിന് മണ്ണിറക്കിയ സ്ഥലത്താണ് വെടിയുണ്ടകള്‍ കണ്ടെത്തിയത്. ഇവ ഉപേക്ഷിക്കാനായിരുന്നു നീക്കമെങ്കില്‍ പ്രദേശത്തെ വനത്തിലേക്ക് വലിച്ചെറിയുകയൊ കുഴിച്ചിടുകയൊ ആകാമായിരുന്നു. വെടിയുണ്ടകള്‍ പൊലിസിന്റെ കരങ്ങളിലെത്തിക്കണമെന്ന ലക്ഷ്യത്തോടെ കൊണ്ടുവന്ന് വച്ചതാകാമെന്നാണ് അന്വേഷണസംഘങ്ങളുടെ കണക്കുകൂട്ടല്‍.