പുതുക്കാട്: മണ്ണപേട്ട തെക്കേക്കരയില്‍ ഗ്യാസ് സിലിണ്ടര്‍ ചോര്‍ന്ന് വീടിന് തീപിടിച്ചു. തെക്കേക്കര ചീനാത്ത് മണിയുടെ വീടിനാണ് തീപിടിച്ചത്.
വീടിന്റെ അടുക്കളഭാഗത്താണ് തീ പടര്‍ന്നത്. ഗൃഹോപകരണങ്ങള്‍ കത്തി നശിച്ചു. ബുധനാഴ്ച രാവിലെ ആറ് മണിയോടെയായിരുന്നു സംഭവം. മണിയുടെ ഭാര്യ സുഷിത സ്റ്റൗ കത്തിക്കുന്നതിനിടെ ഗ്യാസ് ചോരുന്ന ശബ്ദം കേട്ടു. ഉടന്‍ തന്നെ തീ ആളിപ്പടരുന്നത് കണ്ട് സുഷിതയും രണ്ടുമക്കളും മണിയും പുറത്തേയ്ക്ക് ഓടിയതുമൂലം വന്‍ ദുരന്തം ഒഴിവായി.
തീ അണച്ച് സിലിണ്ടര്‍ പുറത്തേയ്ക്ക് മാറ്റുന്നതിനിടെ സമീപവാസികളായ രണ്ടുപേര്‍ക്ക് പൊള്ളലേറ്റു. കുറൂവീട്ടില്‍ ജോയി, കൂപ്ലിക്കാടന്‍ അരവിന്ദാക്ഷന്‍ എന്നിവര്‍ക്കാണ് പൊള്ളലേറ്റത്. ഇവര്‍ പുതുക്കാട് താലൂക്ക് ആശുപത്രിയില്‍ ചികിത്സ തേടി.
നാട്ടുകാര്‍ ചേര്‍ന്നാണ് തീയണച്ചത്. പുതുക്കാട് നിന്നും ഫയര്‍ ഫോഴ്‌സ് സ്ഥലത്തെത്തി.