കൊച്ചി: പെരിയ ഇരട്ടക്കൊല കേസ് അന്വേഷണം സി.ബി.ഐ ഏറ്റെടുക്കണമെന്നാവശ്യപ്പെട്ട് ഇരകളായ ശരത്‌ലാലിന്റെയും കൃപേഷിന്റെയും കുടുംബാംഗങ്ങള്‍ കൊച്ചിയിലെ സി.ബി.ഐ ആസ്ഥാനത്തിന് മുന്നില്‍ ധര്‍ണ നടത്തി. ശരത്‌ലാലിന്റെ പിതാവ് സത്യനാരായണന്‍, അമ്മ ലത, സഹോദരി അമൃത,  കൃപേഷിന്റെ പിതാവ് കൃഷ്ണന്‍, അമ്മ ബാലാമണി, സഹോദരി കൃഷ്ണപ്രിയ എന്നിവരും കോണ്‍ഗ്രസ് നേതാക്കളുമാണ് ധര്‍ണയില്‍ പങ്കെടുത്തത്.

സി.ബി.ഐ അന്വേഷണം ഉന്നത ഇടപെടലിനെ തുടര്‍ന്ന് തടസപ്പെട്ടതായി സംശയമുണ്ടെന്ന് ശരത്‌ലാലിന്റെ പിതാവ് സത്യനാരായണനും കൃപേഷിന്റെ പിതാവ് കൃഷ്ണനും മാധ്യമപ്രവര്‍ത്തകരോട് പറഞ്ഞു. സി.ബി.ഐ അന്വേഷണത്തിനുള്ള വിധി വന്നിട്ട് നാല് മാസമായി. 

സി.ബി.ഐ അന്വേഷണത്തിനെതിരേ സര്‍ക്കാര്‍ ഡിവിഷന്‍ ബെഞ്ചില്‍ അപ്പീല്‍ നല്‍കിയിരുന്നു. എന്നാല്‍, അന്വേഷണം വേണമെന്ന ഉത്തരവ് സ്റ്റേ ചെയ്തിട്ടില്ല. സി.ബി.ഐ സംഘം കാസര്‍കോട്ടെത്തി പ്രാഥമിക വിവരങ്ങള്‍ ശേഖരിച്ചെങ്കിലും പിന്നീട് അന്വേഷണം വഴിമുട്ടുകയായിരുന്നുവെന്നും അവര്‍ പറഞ്ഞു. 

ജസ്റ്റിസ് പി.കെ ഷംസുദ്ദീന്‍, കാലടി സര്‍വകലാശാല മുന്‍ വി.സി ഡോ. ദിലീപ് കുമാര്‍, ബാലകൃഷ്ണന്‍ പെരിയ തുടങ്ങിയവര്‍ സംസാരിച്ചു.