ഓക്ക്‌ലന്‍ഡ്: ന്യൂസിലന്‍ഡിനെതിരായ ഏകദിന പരമ്പര ദക്ഷിണാഫ്രിക്ക സ്വന്തമാക്കി. നിര്‍ണായകമായ അവസാന ഏകദിനത്തില്‍ ആറു വിക്കറ്റിന്റെ വിജയം സ്വന്തമാക്കിയാണു ദക്ഷിണാഫ്രിക്ക അഞ്ചു മത്സരങ്ങളുടെ പരമ്പര 3-2നു നേടിയത്. ആദ്യം ബാറ്റു ചെയ്ത ന്യൂസിലന്‍ഡിന്റെ പോരാട്ടം 41.1 ഓവറില്‍ 149 റണ്‍സില്‍ അവസാനിപ്പിച്ച ദക്ഷിണാഫ്രിക്ക 32.2 ഓവറില്‍ നാലു വിക്കറ്റ് നഷ്ടത്തില്‍ 150 റണ്‍സെടുത്ത് വിജയം സ്വന്തമാക്കുകയായിരുന്നു. 51 റണ്‍സെടുത്തു പുറത്താകാതെ നിന്ന ഫാഫ് ഡുപ്ലെസിസും 35 പന്തില്‍ 45 റണ്‍സുമായി പുറത്താകാതെ നിന്നു ഡേവിഡ് മില്ലറും ദക്ഷിണാഫ്രിക്കന്‍ വിജയം അനായാസമാക്കി.
നേരത്തെ മൂന്നു വിക്കറ്റുകള്‍ വീഴ്ത്തിയ കഗിസോ റബാഡ, രണ്ടു വീതം വിക്കറ്റുകള്‍ വീഴ്ത്തിയ ഇമ്രാന്‍ താഹിര്‍, ഫെലുക്വായോ എന്നിവരുടെ ബൗളിങാണു കിവികളെ കുഴക്കിയത്. 32 റണ്‍സെടുത്ത ഗ്രാന്‍ഡ്‌ഹോമാണു ടോപ് സ്‌കോറര്‍. നീഷം, സാന്റ്‌നര്‍, ബ്രോണ്‍ലി എന്നിവര്‍ 24 വീതം റണ്‍സെടുത്തു. മറ്റൊരാള്‍ക്കും രണ്ടക്കം കടക്കാന്‍ സാധിച്ചില്ല. റബാഡയാണു കളിയിലെ കേമന്‍. പരമ്പര നേട്ടത്തോടെ ഏകദിന റാങ്കിങിലെ ഒന്നാം സ്ഥാനം നിലനിര്‍ത്താനും ദക്ഷിണാഫ്രിക്കയ്ക്കായി.