കോഴിക്കോട്: 'നിലപാടുകളുടെ കരുത്ത്, വ്യതിയാനങ്ങളുടെ തിരുത്ത് ' പ്രമേയത്തില്‍ ഒരു വര്‍ഷമായി നടന്നുവരുന്ന എസ്.കെ.എസ്.എസ്.എഫ് മുപ്പതാം വാര്‍ഷികാഘോഷങ്ങളുടെ സമാപനം 'ട്രൈസനേറിയം സമ്മിറ്റ് ' 29നു കൊയിലാണ്ടിയില്‍ നടക്കും. രാവിലെ 9.30 മുതല്‍ സ്‌പോര്‍ട്‌സ് കൗണ്‍സില്‍ സ്റ്റേഡിയത്തിലാണു പരിപാടി. 2019 ഫെബ്രുവരിയില്‍ ആരംഭിച്ച വാര്‍ഷികാഘോഷ പരിപാടികള്‍ ഇതോടെ സമാപിക്കും. 29നു രാവിലെ സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ ഉദ്ഘാടനം ചെയ്യും. അബ്ബാസലി ശിഹാബ് തങ്ങള്‍ അധ്യക്ഷനാകും. സമസ്ത ജനറല്‍ സെക്രട്ടറി പ്രൊഫ. കെ. ആലിക്കുട്ടി മുസ്‌ലിയാര്‍ അനുഗ്രഹ ഭാഷണം നടത്തും. കെ. മുരളീധരന്‍ എം.പി മുഖ്യാതിഥിയാകും. എ.വി അബ്ദുറഹ്മാന്‍ മുസ്‌ലിയാര്‍, കെ. ഉമര്‍ ഫൈസി മുക്കം, കെ. ദാസന്‍ എം.എല്‍.എ, ഹുസൈന്‍ ബാഫഖി തങ്ങള്‍ സംബന്ധിക്കും.

തുടര്‍ന്ന് അബ്ദുസ്സലാം ഫൈസി ഒളവട്ടൂര്‍ തര്‍ബിയ സെഷനു നേതൃത്വം നല്‍കും. ശേഷം 'നാം, നമ്മുടെ പ്രസ്ഥാനം' വിഷയത്തില്‍ ഓപണ്‍ ഫോറം നടക്കും. അബ്ദുല്‍ ഹമീദ് ഫൈസി അമ്പലക്കടവ്, മുസ്തഫ മുണ്ടുപാറ, ഷാഹുല്‍ ഹമീദ് മേല്‍മുറി, നാസര്‍ ഫൈസി കൂടത്തായ്, ഓണമ്പിള്ളി മുഹമ്മദ് ഫൈസി എന്നിവര്‍ നേതൃത്വം നല്‍കും. എസ്.വി മുഹമ്മദലി മോഡറേറ്ററാകും.

ഉച്ചയ്ക്കു ശേഷം ആരംഭിക്കുന്ന 'നമ്മുടെ കര്‍മമേഖല' സെഷന്‍ എം.ടി അബ്ദുല്ല മുസ്‌ലിയാര്‍ ഉദ്ഘാടനം ചെയ്യും. ഹമീദലി ശിഹാബ് തങ്ങള്‍ അധ്യക്ഷനാകും. ഡോ. കെ.ടി.എം ബഷീര്‍ പനങ്ങാങ്ങര ചര്‍ച്ചയ്ക്കു നേതൃത്വം നല്‍കും. തുടര്‍ന്ന് 'മതം മതേതര ഇന്ത്യക്ക്' വിഷയത്തില്‍ സൗഹൃദ സംവാദം നടക്കും. സാദിഖലി ശിഹാബ് തങ്ങള്‍, ഡോ. ശ്രീ ശ്രീ ആര്യ മഹര്‍ഷി, ഫാദര്‍ ഡോ. ജെറോം ചിങ്ങന്തറ സംബന്ധിക്കും. വൈകിട്ട് ഏഴിനു നടക്കുന്ന സംസ്ഥാന കൗണ്‍സിലില്‍ 2020-22 ലേക്കുള്ള സംസ്ഥാന ഭാരവാഹികളെ തിരഞ്ഞെടുക്കും. തിരഞ്ഞെടുപ്പ് സമിതി കണ്‍വീനര്‍ കെ. മോയിന്‍ കുട്ടി മാസ്റ്റര്‍ നേതൃത്വം നല്‍കും. 

നിലവിലുള്ള സംസ്ഥാന കൗണ്‍സിലിന്റെ സമാപനയോഗം 28നു വൈകിട്ട് 4.30നു കോഴിക്കോട് സുപ്രഭാതം ഓഡിറ്റോറിയത്തില്‍ ചേരും. സുന്നി യുവജന സംഘം ജനറല്‍ സെക്രട്ടറി സയ്യിദ് മുഹമ്മദ് കോയ തങ്ങള്‍ ജമലുല്ലൈലി ഉദ്ഘാടനം ചെയ്യും. സംസ്ഥാന പ്രസിഡന്റ് ഹമീദലി ശിഹാബ് തങ്ങള്‍ അധ്യക്ഷനാകും.